काठमाडौं, १५ माघ । ऊर्जा उत्पादन र कम्पनी व्यवस्थापनमा सफल देखिएको बुटवल पावर कम्पनीले निष्काशन गरेको थप ४० करोड ८१ लाख रुपैयाँ बराबरको ४० लाख ८१ हजार कित्ता शेयरको बिक्री खुला भएको छ ।

कम्पनीले एक सय रुपैयाँ अंकित मूल्यमा ४ सय १ रुपैयाँ प्रिमियम सहित प्रतिकित्ता ५ सय १ रुपैयाँमा उक्त शेयर बिक्रीमा ल्याएको हो ।

एफपिओमा छिटोमा माघ १९ गते र ढिलोमा फागुन १५ गतेसम्म आवेदन गर्न पाइनेछ ।कम्पनीको एफपिओ निष्काशनकर्ता एनएमबि क्यापिटल रहेको छ ।

लगानीकर्ताले एनएमबि क्यापिटल नागपोखरी, लक्ष्मी क्यापिटल बानेश्वर, बुटवल पावर कम्पनी, वुद्ध नगर तथा आस्वा सदस्य रहेका जुनसुकै बैंक तथा वित्तीय संस्थाबाट आवेदन गर्न सक्नेछन्।

कम्पनीको एफपिओमा न्यूनतम १० कित्ता अर्थात ५ हजार १० रुपैयाँदेखि अधिकतम २० हजार ४ सय कित्ता अर्थात १ करोड २ लाख २० हजार ४ सय रुपैयाँसम्मको आवेदन गर्न पाइनेछ ।

एफपिओबाट संकलित रकम कम्पनीले निमार्ण थालेका ३० मेगवाटको ड.ादी जलविद्युत आयोजना र ३७ दशमलव छ मेगावाटको काबेली ए जलविद्युत आयोजनामा लगाउनेछ ।

यी आयोजना विदेशी साझोदार तथा स्वदेशी साझेदारसँगको सहकार्यमा सन् २०२० सम्म सम्पन्न गर्ने कम्पनीको लक्ष्य रहेको छ ।

बीपीसी १ सय मेगावाटको मनाङ मर्स्याङ्दी आयोजनाको अनुमति लिने क्रममा रहेको छ भने ८५ मेगावाटको चिनीखोला साना जलविद्युत आयोजना सम्भाब्यता अध्ययन पुरा गरिसकेको छ ।

हाल यो कम्पनीको दोस्रो बजारमा प्रतिकित्ता सेयर ६३० रुपैयाँको हाराहारीमा कारोबार भईरहेको छ ।

इक्रा नेपालले यो कम्पनीको सबै बित्तीय सूचकहरुको अध्ययनपछि बीपीसीको एफपीओलाई ‘ग्रेड ३’ को रेटिङ प्रदान गरेको छ । यसले कम्पनीका आधारभूत पक्षहरु औसत र सन्तोषजनक छन् भन्ने देखाउछ ।

१ अर्ब ८१ करोड ५ लाखको चुक्तापुँजी रहेको बीपीसीले एफपीओ विक्री पछि चुक्ता पुँजी २ अर्ब २२ करोड ८६ लाख पुग्नेछ । कम्पनीले गत बर्ष झण्डै ६५ करोड रुपैया नाफा गरेको थियो । बुटवल पावरले चालु आर्थिक वर्षको पहिलो त्रैमासमा ७ करोड २२ लाख खूद नाफा आर्जन गरेको थियो । अघिल्लो आर्थिक बर्षको पहिलो त्रैमासमा २ करोड १५ लाख नाफा खुद नाफा आर्जन गरेको थियो ।