कोलम्बो(श्रीलंका), ६ भदौ । श्रीलंकाको भ्रमणमा रहेको नेपाली टोलीले श्रीलंका आर्मी क्रिकेट क्लब बिरुद्धको पहिलो अभ्यास खेल ६७ रनले जितेको छ।
टस जित्दै पहिले ब्याटिंग गर्ने निर्णय लिएको नेपाली टोलीले ४८.४ ओभरमा सबै विकेट गुामाएर १ सय ९४ रन जोडेको थियो। सातौ विकेट झर्दा ९१ रनमा खुम्चिएको नेपालको ब्याटिंगलाई उकास्न आरिफ शेखले उत्कृष्ट ब्याटिंग गरेका थिए। सर्वाधिक ८९ रन बनाउने क्रममा आरिफले १ सय १८ बलसंग खेल्दै ५ चौका र ४ छक्का प्रहार गरे।
आठौँ विकेटका लागि आरिफले बसन्त रेग्मीसगं महत्वपूर्ण २९ रनको साझेदारी गरेका थिए। त्यसपश्चात आरिफले क्रमश ललित भण्डारी र ललित राजबंशीसंग नवौं र दशौँ विकेटका लागि ५२ र २२ रनको साझेदारी गरेका थिए।
जवाफमा १ सय ९५ रनको सामान्य विजय लक्ष्य लिएर मैदान उत्रिएको घरेलु सैनिक टोलीले नेपाली बलिंगको अगाडी ३६.१ ओभर मात्र ब्याटिंग गर्न सक्यो। आर्मीले १ सय २७ रन जोड्न सबै १० विकेट गुमाएपछि नेपालले पहिलो अभ्यास खेलमा ६७ रनको जित हात पार्यो।
आर्मीको ब्याटिंगमा जगत राजापाक्षेले सर्वाधिक ४६ रन जोडेपनि त्यो जितका लागि पर्याप्त हुन सकेन। आर्मीको ब्याटिंगलाई धरासायी पार्ने क्रममा नेपालको बलिंगतर्फ सोमपाल कामी र बसन्त रेग्मीले समान ३ तीन विकेट लिए। आफ्नो ७ ओभरको स्पेलमा सोमपालले ३१ रन खर्चंदा ७.१ ओभर बलिंग गरेका बसन्तले भने २० रन मात्र खर्चिए। यस्तै दिपेन्द्र सिंह ऐरीको नाममा २ विकेट रह्यो।
मलेसियामा हुने एसिया कप छनौटको तयारीका लागि श्रीलंका पुगेको नेपाली टोलीले आफ्नो दोस्रो अभ्यास खेलमा शुक्रवार ब्लुम फिल्डको सामना गर्नेछ। तीन अभ्यास खेल खेलेर नेपाली टोली अगष्ट २७ तारिखमा प्रतियोगिताका लागि मलेसिया उड्नेछ।
