काठमाडौं, २८ फागुन । आईसीसी टी २० विश्वकपमा सहभागिता र एक खेल जितेको आधारमा नेपाली राष्ट्रिय क्रिकेट टिमलाई आईसीसीले २ लाख ५६ हजार १ सय ५४ डलर पुरस्कार दिने भएको छ।
अन्तर्राष्ट्रिय क्रिकेट परिषद् (आईसीसी)ले बुधबार विश्वकप खेले बापत खेलाडीले पाउने रकम टुंगो लगाएको हो ।
आईसीसीले विश्वकपमा सहभागी २० टोलीका लागि कुल १ करोड १२ लाख ५० हजार डलर पुरस्कार रकम तोकेको छ।
यस पटकको विश्वविजेता भारतले उपाधिसहित सबैभन्दा बढी २६ लाख ३९ हजार ४ सय २३ डलर पाउनेछ भने अन्य टोलीले प्रदर्शनअनुसार फरक–फरक रकम प्राप्त गर्नेछन्।
प्रतियोगितामा सहभागिता भएबापत एउटा टोलीले कम्तीमा २ लाख २५ हजार डलर पाउने तय थियो । नेपालले एक खेल जितेका हुनाले ३१ हजार डलरभन्दा बढी थप रकम पाएको हो । तेस्रो पटक विश्वकप खेल्ने क्रममा पहिलो ३ खेलमा इंग्ल्यान्ड, इटाली, वेस्ट इन्डिजसँग पराजित नेपालले अन्तिम खेलमा स्कटल्यान्डलाई ७ विकेटले पराजित गरेको थियो ।
आईसीसीका अनुसार प्रत्येक खेलको जितमा बोनस रकम राखिएको थियो भने समूहचरण, सुपर एट, सेमिफाइनल र फाइनल खेलेको टोलीलाई यसअघि नै निश्चित पुरस्कार रकम तोकिएको थियो । त्यसैको आधार मानेर कर काटेर पुरस्कार रकम प्रदान गरिने आईसीसीले जनाएको छ ।
नेपालसहित इटाली, नेदरल्यान्ड्स र यूएईले समान २ लाख ५६ हजार १ सय ५४ डलर पाउने भएका छन् । इटालीले एकमात्र विजय हात पार्नेक्रममा नेपाललाई १० विकेटले पराजित गरेको थियो । प्रतियोगितामा एउटै खेल जित्न नसकेको क्यानडा, नामिबिया र ओमानका खेलाडीको भागमा २ लाख २५ हजार डलर पुरस्कार राशि रहेको छ ।
