काठमाडौं, २ चैत्र । निर्वाचनको लागि गठन गरिएको सुशिला कार्की नेतृत्वको अन्तरिम सरकार चुनाव सकाएर निर्वाचित सरकारलाई सत्ता हस्तान्तरण गरेर बिदा लिने तरखरमा छ ।

सिंगो देश आगजनी, तोडफोड र विध्वंशमा परेर प्रधानमन्त्रीले राजिनामा गरेर हिंडेको बेलामा सत्ता सम्हाल्न आइपुग्नुभएकी सुशीला कार्कीले प्रतिनिधि सभा विघटनको सिफारिस गरेर निर्धारित मितिभित्रै चुनाव सम्पन्न गर्नुभयो । चारैतिरबाट प्रशंसा पाइरहनुभएकी कार्कीको सरकारले जाने बेलामा भने पेट्रोलियम पदार्थको भाउ बढाएको छ ।

इरानमाथि इजरायली र अमेरिकन आक्रमणका कारण मध्यपूर्वमा भइरहेको युद्धका कारण पेट्रोलियम पदार्थको नियमित आपूर्तिमा व्यवधान आएकोले अन्तर्राष्ट्रिय रुपमा नै पेट्रोलियम पदार्थको मूल्य वृद्धि भएको हो ।

नेपालमा पेट्रोलियम पदार्थको आपूर्तिको जिम्मेवारी पाएको नेपाल आयल  निगम लिमिटेडले पेट्रोलियम पदार्थको मूल्य वद्धि गरेको छ ।

अन्तरराष्ट्रिय बजारमा भएको मूल्य वृद्धि तथा आपूर्ति व्यवस्थापनको दबाबलाई कारण देखाउँदै नेपाल आयल निगमले पेट्रोल, डिजेल तथा मट्टीतेलको खुद्रा बिक्री मूल्य वृद्धि भएको जनाएको छ ।

निगमका अनुसार नयाँ मूल्य आइतबार मध्यरातदेखि नै  लागू हुने गरी समायोजन गरिएको छ । मूल्य समायोजनपछि पेट्रोलमा प्रतिलिटर रु ३१, डिजेलमा प्रतिलिटर रु ५४ तथा खाना पकाउने एलपि ग्यासमा रु २१६ वृद्धि गरिएको छ ।

सो मूल्य वृद्धि भएसँगै अब पेट्रोल प्रतिलिटर रु १८८, डिजेल रु १९६ र एलपि ग्यास प्रति सिलिन्डर रु दुई हजार १२६ रुपैयाँ कायम भएको छ ।

अन्तरराष्ट्रिय बजारमा बढेको मूल्यका आधारमा उक्त कम्पनीबाट प्राप्त नयाँ मूल्यसूचीअनुसार नेपालमा मूल्य समायोजन गर्नुपरेको निगमले जनाएको छ ।

—