काठमाडौं, ३१ भदौ । बंगलादेशमा आयोजना हुने अन्डर-१९ युथ एसिया कप प्रतियोगिताको टाई सिट प्रकाशित भएको छ ।
नेपालले पहिलो खेल भारतसँग खेल्ने भएको छ ।
एसीसीले शनिवार सार्वजनिक गरेको खेल तालिका अनुसार नेपाल समुह ‘ए’ मा परेको छ ।
मलेसियामा २०१७ नोभेम्बरमा सम्पन्न प्रतियोगिताको अघिल्लो संस्करणमा नेपालले भारतलाई पराजित गर्दै इतिहासमै पहिलो पटक सेमीफाइनलसम्मको यात्रा तय गरेको थियो। यो प्रतियोगिताको साविक विजेता भारत रहेको छ ।
अहिले नेपाली यु १९ टोली भारतमा अफगानिस्तान र भारतको टीम ए र बी सँग लखनऊमा ५० ओभरको प्रतियोगिता खेलिरहेको छ ।
प्रतियोगितामा ८ राष्ट्रहरु सहभागी हुनेछन् जसलाई २ वटा समुहमा बिभाजन गरिएको छ।समुह ‘ए’ मा नेपालसँगै साविकको विजेता भारत, अफगानिस्तान र युएई रहेका छन्। यस्तै समुह ‘बि’ मा आयोजक बंगलादेश, हंगकंग, पाकिस्तान र श्रीलंका रहेका छन्।
२ वटा समुहबाट उत्कृस्ट २ हुने ४ टिमहरु सेमीफाईनल खेल्न छनौट हुनेछन्। अक्टोबर ४ र ५ तारिकमा सेमीफाईनल र अक्टोबर ७ तारिकमा फाईनल खेलिनेछ।
