काबुल(अफगानिस्तान),१७ बैशाख (बीबीसी )। अफगानिस्तानको राजधानी काबुलमा भएका दुई बम आक्रमणमा परी नौ पत्रकारसहित २६ जनाको मृत्यु भएको छ।
तिनमध्ये समाचार संस्था एएफपीका काबुलस्थित प्रमुख फोटोग्राफर शाह माराई पनि रहेका छन्।
पहिलो विस्फोट मोटरसाइकलमा आएका एक जना आक्रमणकारीले गराएका थिए।
पहिलो घटना भएको स्थानमा जम्मा भएका सञ्चारकर्मी र अरू सर्वसाधारणको भिडमा १५ मिनेट जतिपछि दोस्रो विस्फोट भएको थियो।
जिम्मेवारी
इस्लामिक स्टेट समूहले आक्रमणको जिम्मेवारी लिएको छ।
एएफपीले सामाजिक सञ्जाल ट्विटरमा लेख्दै दोस्रो विस्फोट नियतवश पत्रकारहरूप्रति लक्षित भएको दाबी गरेको छ।
#UPDATE Agence France-Presse's chief photographer in Kabul, Shah Marai, has been killed.
He died in a blast that was targeting a group of journalists who had rushed to the scene of a suicide attack in the Afghan capital pic.twitter.com/rOa4rg24x9— AFP News Agency (@AFP) April 30, 2018
एक जना प्रहरी प्रवक्तालाई उद्धृत गर्दै एएफपीले पत्रकारको भेषमा आएका बम आक्रमणकारीले भिडमा विस्फोट गराएको जनाएको छ।
रेडिओ फ्री युरोप (आरएफई) ले उसका दुई पत्रकारहरू पनि मारिएको पुष्टि गरेको छ। उनीहरू अब्दुल्लाह हानन्जाई र मोहर्रम दुर्रानी भएको बताइएको छ।
आरएफईका अनुसार हानन्जाईले लागुपदार्थबारे एउटा समाचार सामग्रीमा र दुर्रानीले महिलासम्बन्धी साप्ताहिक कार्यक्रमका लागि काम गर्दै थिए।
घटनामा आरएफईकै लागि काम गर्ने अर्का एक जना पत्रकार पनि घाइते भएका छन्। अर्को समाचार संस्था रोएटर्सले आफ्नो एक फोटोग्राफर पनि छर्रा लागेर घाइते भएको जनाएको छ।
सोमवार भएको घटनामा पत्रकारसहित चार प्रहरीहरू मारिएको एक जना सरकारी अधिकारीले बीबीसीलाई बताए।
एएफपीले वानटीभीका दुई, टोलो न्यूजका एक र जहाँ टीभीका एक पत्रकार मारिएको विवरण दिएको छ।
इस्लामिक स्टेटले जारी गरेको एउटा विज्ञप्तिमा देशको गुप्तचर निकायको मुख्यालयलाई आक्रमणको निशाना बनाइएको बताइएको छ। आक्रमण भएको शाश्दारक क्षेत्रमा अफगानिस्तानको रक्षा मन्त्रालय, गुप्तचर सेवा कार्यालय र उत्तर एट्लान्टिक सन्धि सङ्गठन नेटोको कार्यालय रहेका छन्।
बीबीसी सम्वाददाता पनि मारिए
एउटा छुट्टै घटनामा खोस्त प्रान्तमा बीबीसी सम्वाददाता अहमद शाह एक आक्रमणमा मारिएका छन्।
उनन्तीस वर्षीय शाह बीबीसी अफगान सेवाका लागि एक वर्षभन्दा बढी समयदेखि कार्यरत थिए।
