डसेलडोर्फ(बेल्जियम), १८ आषाढ(एजेन्सी)। यूरोकप २०२४ को प्रि क्वाटरफाइनलमा प्रतिस्पर्धी बेल्जियमले गरेको आत्मघाती गोल उसलाई अभिशाप भयो भने फ्रान्सका लागि वरदान । यही आत्मघाती गोलको सहारामा बेल्जियमलाई परास्त गर्दै फ्रान्स युरो कप २०२४ को क्वाटरफाइनलमा प्रवेश गरेको छ ।
डसेलडोर्फमा भएको प्रिक्वाटरफाइनलमा आत्मघाती गोलको मद्दतमा १ ० को जित दर्ता गर्दै फ्रान्स अन्तिम आठमा प्रवेश गरेको हो ।
खेलको एकमात्र गोल ८५औं मिनेटमा आत्मघाती गोलको रूपमा आएको थियो । रान्डाल कोलो मुआनीको प्रहार बेल्जियम डिफेन्डर यान भर्टङगनलाई लागेर गोलमा परिणत भएको थियो । सोही गोलको मद्दतले फ्रान्स क्वाटरफाइनलमा प्रवेश गरेको हो ।
दुई दावेदार टोली बीच आँकलन गरेभन्दा केही फितलो प्रदर्शन प्रस्तुत भएको थियो । दुवै टोलीले मौकाहरु सिर्जना गर्न संघर्ष गर्नु परेको थियो । र अन्त्यमा खेलको छिनोफानो आत्मघाती गोलले हुन पुग्यो ।
फ्रान्सले अब क्वाटरफाइनलमा पोर्चुगलसंग खेल्नेछ ।
फ्रान्ससहित अहिलेसम्म क्वाटरफाइनलमा पुग्ने टोलीहरूमा पोर्चुगल, जर्मनी, स्पेन, स्विटजरल्यान्ड र इङ्ल्यान्ड रहेका छन् ।
