कीर्तिपुर(काठमाडौं), ६ पौष । सिद्धार्थ बैंक नेपाल प्रिमियर लिग (एनपीएल) को पहिलो संस्करण उपाधिका लागि आज सुदूरपश्चिम रोयल्स र जनकपुर बोल्ट्सबीच महाभिडन्त हुँदैछ ।

आजको फाइनल खेल एनपीएलका हालसम्मका खेलहरु भएको कीर्तिपुरस्थित त्रिभुवन विश्वविद्यालयको क्रिकेट मैदानमा दिउँसो १२ः३० बजे सुरु हुनेछ ।

सुदूरपश्चिम रोयल्सले लिग चरणमा शीर्ष स्थानमा रहँदै र दोस्रोमा रहँदै जनकपुर बोल्ट्स प्ले अफमा पुगेको थियो ‌।

लिग र पहिलो क्वालिफायर दुवैमा जनकपुरमाथि सुदूरपश्चिम विजयी भएको थियो । पहिलो संस्करणको नेपाल प्रिमियर लिगमा दुई टोलीको यो भेट तेस्रो हो।

उपाधि जित्ने दुवै कप्तानको दाबी

फाइनल दुवै टोलीका कप्तानले आफूहरुले उपाधि जित्नेमा आशावादी रहेको बताए। सुदूरपश्चिमका कप्तान दीपेन्द्रसिंह ऐरीले आफुहरुले लिग चरण देखि अहिलेसम्म आउँदा राम्रो प्रदर्शन गरेको बताए । फाइनलमा पनि सोहि लयलाई निरन्तरता दिने प्रयास गर्ने उनको भनाई थियो।

‘हाम्रो प्रदर्शन कस्तो रह्यो तपाइहरु सबैले देख्नु भएको नै छ । आज पनि २ घण्टा अभ्यास गर्यौ,’ कप्तान ऐरीले भने ‘समग्रमा हाम्रो तयारी राम्रो नै रहेको छ । उपाधि जित्ने अन्तिम तयारीमा छौं ।’

खेलाडीहरु सबै जना लयमा रहेको कारण उपाधि जित्नेमा जनकपुरका कप्तान आसिफ शेख पनि ढुक्क देखिए ।

‘अहिलेसम्मका खेलहरु राम्रै भएको छ । फरक फरक विकेटमा खेल्दै लो स्कोरिङ र हाइ स्कोरिङ म्याचहरु खेलेका छौं,’ कप्तान आसिफले भने ‘सबै जना राम्रो लयमा देखिरहनु भएको छ । अब लास्ट १ गेम बाँकी रहेको छ । यसमा राम्रो प्रदर्शन गर्नेमा ढुक्क छौ ।’

लिग चरण र पहिलो क्वालिफायरमा जनकपुर र सुदूरपश्चिमले एक अर्काको सामना गरेका थिए । दुवै भेटमा सुदूरपश्चिमले जनकपुरमाथि सहज जित हात पारेको थियो । लिग चरणको १८औं खेलमा सुदूरपश्चिम र जनकपुर आमनेसामने भएका थिए । लिग चरणको खेलमा सुदूरपश्चिमले जनकपुरलाई ७२ रनको फराकिलो हार चखाएको थियो ।

सुदूरपश्चिमले दिएको १ सय २४ रनको लक्ष्य पछ्याउने क्रममा जनकपुर ५१ रनको झिनो स्कोरमा समेटिएको थियो । लिग चरणमा शीर्ष दुईमा रहेका यि दुवैले पहिलो क्वालिफायर खेलेका थिए । बुधवारको पहिलो क्वालिफायरमा यि आमनेसामने भएका थिए । पहिलो क्वालिफायरमा पनि जनकपुरमाथि हाबी सुदूरपश्चिमले ८ विकेटको फराकिलो जित हात पारेको थियो ।

पहिलो क्वालिफायर जित्दै सुदूरपश्चिमले सिधै फाइनल यात्रा तय गरेको थियो । जनकपुर भने दोस्रो क्वालिफायरको बाटो हुँदै फाइनलसम्म पुगेको हो । दोस्रो क्वालिफायरमा जनकपुरले इलिमिनेटको विजेता कर्णाली याक्समाथि २ विकेटको कठिन जित हात पारेको थियो ।

मैदानमा उत्रिने सम्भावित खेलाडी

जनकपुरले फाइनल खेलमा पनि दोस्रो क्वालिफायरमा खेलाएको सेट नै मैदान उतार्ने सम्भावना छ ।

जनकपुर बोल्ट्सको सम्भावित ११ खेलाडीमा आकाश त्रिपाठी, आसिफ शेख, लाहिरु मिलान्था(विकेटकिपर), हर्ष ठाकर, जेमी निशम, शुभ कसांकार, मोहम्मद मोहसिन, शेर मल्ल, मयन यादव, किशोर महतो र ललित राजवंशी रहेका छन् ।

यता सुदूरपश्चिमले कप्तान दीपेन्द्रसिंह ऐरी लगायत धेरै आफ्नै क्षेत्रका खेलाडीलाई टोलीमा राखेको सुदूरपश्चिम प्रतियोगिताको बलियो टोलीका रुपमा फाइनल पुगेको छ । सुदूरपश्चिमले पनि पहिलो क्वालिफायरमा जनकपुरविरुद्ध खेलेको टिमलाई निरन्तरता दिने सम्भावना छ ।

सुदूरपश्चिम रोयल्सको सम्भावित प्लेइङ ११ मा दीपेन्द्रसिंह ऐरी, हर्मित सिंह, विनोद भन्डारी(विकेटकिपर), ब्रेन्डन मक्मेलन, सेफ जेब, आरिफ शेख, इशान पान्डे, स्कट कुगेलेन, नरेन साउद, अभिनाष बोहोरा र नरेश बुढाऐर रहेका छन् ।

कार पाउने नेपाली खेलाडी को बन्लान् ?

एनपिएलको उपाधिसँगै कुन नेपाली खेलाडी कार जित्ला भन्ने चासो पनि दर्शकमा रहेको छ ।

सुदूरपश्चिम रोयल्सका कप्तान दीपेन्द्रसिंह ऐरी, जनकपुर बोल्ट्सका बलर ललितनाराण राजवंशी तथा लुम्बिनी लायन्सका कप्तान रोहितकुमार पौडेललाई‌ कारको मुख्य दाबेदारका रुपमा हेरिएको छ।