न्युयोर्क(संयुक्त राज्य अमेरिका), ३१ जेठ(एजेन्सी) । पाँच पटकको विश्वविजेता ब्राजिललाई भिनिसियस जुनियरको सानदार व्यक्तिगत प्रयासले हारबाट जोगाएको छ।

समूह चरणको पहिलो खेलमा मोरक्कोसँग १–१ को बराबरी खेलेपछि ब्राजिलले सन् १९३४ यता कायम रहेको विश्वकपको पहिलो खेलमा अपराजित रहने कीर्तिमानलाई निरन्तरता दिएको छ।

न्युयोर्क–न्यु जर्सी स्टेडियममा भएको खेलमा अफ्रिकी च्याम्पियन मोरक्कोले सुरुदेखि नै प्रभावशाली प्रदर्शन गर्दै ब्राजिललाई दबाबमा राख्यो।

खेलको २१औँ मिनेटमा इस्माइल साइबारीले गोल गर्दै मोरक्कोलाई अग्रता दिलाए। ब्राजिलका गोलकिपर एलिसन बेकर र रक्षकहरू गाब्रिएल मगल्हाएस तथा मार्किन्होसबीच समन्वय अभाव हुँदा प्राप्त अवसरलाई साइबारीले सदुपयोग गरेका थिए। उनले पेनाल्टी क्षेत्रबाहिरबाट आएको बललाई एलिसनमाथिबाट चिप गर्दै गोल गरेका थिए।

यो गोलसँगै मोरक्को विश्वकपमा दक्षिण अमेरिकी टोलीविरुद्ध गोल गर्ने पहिलो अवसरमा सफल भयो। यसअघि उसले सन् १९७० मा पेरु र १९९८ मा ब्राजिलविरुद्ध गोल गर्न सकेको थिएन।

मोरक्कोले खेलमा निरन्तर दबाब कायम राख्यो। ३०औँ मिनेटसम्म उसले १२ प्रहार गरिसकेको थियो, जुन ब्राजिलले विश्वकपमा सन् २०१८ मा मेक्सिकोविरुद्ध खेलेयता सामना गरेको सबैभन्दा धेरै प्रहार थियो।

तर अवसरहरूलाई गोलमा परिणत गर्न नसक्दा मोरक्कोले अग्रता जोगाउन सकेन। ३२औँ मिनेटमा ब्रुनो गिमारेसको पासमा भिनिसियस जुनियरले पेनाल्टी क्षेत्रभित्र बल नियन्त्रण गर्दै रक्षकलाई छक्याएर शक्तिशाली प्रहार गरे। उनको सानदार गोलले ब्राजिललाई खेलमा फर्कायो।

रियल म्याड्रिडका फरवार्ड भिनिसियसका लागि यो ब्राजिलको जर्सीमा ५०औँ खेल थियो। उनले राष्ट्रिय टोलीका लागि आफ्नो १०औँ गोल पनि पूरा गरे।

पहिलो हाफको इन्जुरी समयमा लुकास पाकेटाले ब्राजिललाई अग्रता दिलाउने अवसर पाए पनि उनको आकर्षक प्रहार मोरक्कोका गोलकिपर यासिन बोनोले कर्नरमा फर्काइदिए।

दोस्रो हाफमा प्रशिक्षक कार्लो एन्सेलोटीको टोलीले खेलमा सुधारिएको प्रदर्शन गर्‍यो। ब्राजिलका २००२ विश्वकप विजेता टोलीका सदस्यहरू रोनाल्डो, काका र रोबर्टो कार्लोस दर्शकदीर्घामा उपस्थित थिए।

यद्यपि दोस्रो गोलका लागि दुवै टोलीले संघर्ष गर्नुपर्‍यो। राफिन्हा ब्राजिलका लागि जित दिलाउने गोल नजिक पुगेका थिए, तर ब्रुनो गिमारेसको लो क्रसमा उनी समयमै बलमा पुग्न सकेनन्।

अन्ततः खेल १–१ को बराबरीमा समाप्त भयो। यससँगै मोरक्कोको विश्वकपको पहिलो खेलमा पहिलो जितको प्रतीक्षा अझै लम्बिएको छ भने ब्राजिलले आफ्नो ऐतिहासिक अपराजित सुरुआती कीर्तिमान जोगाएको छ।