काठमाडौं, ८ असोज । जिम्बाबे र सिंगापुरसंग त्रिकोणात्मक सिरिज खेल्न नेपाली राष्ट्रिय क्रिकेट टोली बुधबार बेलुका सिंगापुर प्रस्थान गरेको छ।

नेपाली राष्ट्रिय टोलीलाई राष्ट्रिय खेलकुद परिषदका सदस्यसचिव रमेश सिलवालले खेलाडीहरुलाई विदाई गर्नुभयो।

नेपाली राष्ट्रिय टोली राति १० बजे त्रिभुवन अन्तर्राष्ट्रिय विमानस्थलबाट सिल्क एअरबाट सिंगापुरतर्फ प्रस्थान गरेको हो।

क्यारेबियन प्रिमियर लिगमा खेलिरहेका राष्ट्रिय टीमका सदस्य सन्दीप लामिछाने सिंगापुरको त्रिकोणात्मक श्रृखलाकोलागि वेस्ट इन्डिजबाट बुधबारै प्रस्थान गरी बिहिबार सिंगापुर पुग्ने कार्यक्रम छ ।

नेपालले भोलि शुक्रबार जिम्बाबेसंग त्रिकोणात्मक सिरिजको पहिलो खेल खेल्नेछ।

राष्ट्रिय खेलकुद परिषद सदस्य सचिव रमेश सिलवालले टीमलाई खादा ओडाएर बिदाई गर्नुभयो। बिदाई कार्यक्रममा शुभकामना दिंदै उहाँले क्रिकेट संघको आसन्न चुनावको बारेमा बोल्नुभएको थियो ।

उहाँले अक्टोबर १३ मा हुने आईसीसीको मिटिंगले नेपालको प्रतिबन्ध फुकुवा गर्ने विश्वास गर्दै क्रिकेट संघको असोज १० र ११ गते हुने निर्वाचनले नेपाली क्रिकेटलाई स्पष्ट दिशा दिने बताउनुभयो ।

उहाँले अबको क्रिकेट संघ सिस्टममा जान्छ या जाँदैन, पारदर्शी हुन्छ हुँदैन, गुड गभरनेन्स हुन्छ या हुँदैन त्यसको आधारमा नेपाललाई आईसीसीले दिने सहयोग र नेपाली क्रिकेटको भविष्य निर्धारण बताउदै प्रतिबन्धको अबधिमा क्रिकेट बचाएको खेलाडी र खेल प्रेमीहरुलाई स्यालुट गर्नुपर्ने बताउनुभयो ।

बिदाई कार्यक्रमा नेपाली टीमका कप्तान पारस खड्काले क्रिकेट संघको निर्वाचनले नेपाली क्रिकेटको विकासको नयाँ ढोका खुल्ने बताउदै यसले आफूसहित धेरै खेलाडीको भविष्य पनि निर्धारण गर्ने बताउनुभयो ।

सिंगापुर र ओमान सिरिजमा इशान पाण्डे र कुशल मल्ल जस्ता नयाँ खेलाडीले मौका पाएका छन् भने शरद भेषवाकर , बसन्त रेग्मी र ज्ञानेन्द्र मल्ल जस्ता खेलाडीहरु बाहिर परेका छन् । यस्तै टीममा सुशन भारी, पवन सर्राफ, रोहित पौडेल, सन्दीप जोरा, ललित राजबंशी जस्ता युवा खेलाडीहरुले मौका पाएका छन्। दीपेन्द्र ऐरीले ज्ञानेन्द्र मल्लको अनुपस्थितिमा पहिलो पटक टिमको उपकप्तानी गर्नेछन्।