काठमाडौं, २५ पौष । नेपाली कांग्रेसको प्रवक्तामा युवा नेता विश्वप्रकाश शर्मा नियुक्त भएका छन् ।
नेपाली कांग्रेसका सभापति श्री शेरबहादुर देउवाले युवा नेता शर्मालाई मंगलबार नियुक्त गरेका हुन ।
नेपाली कांग्रेसका मुख्य सचिव कृष्णप्रसाद पौडेलद्धारा मंगलबार जारी गरिएको प्रेस विज्ञप्तिमा नेपाली कांग्रेसका सभापति शेरबहादुर देउवाले नेपाली कांग्रेसको विधान, २०१७ (२०५१, २०५४, २०५७, २०६२, २०६४, २०६६, २०६९ र २०७२ मा संशोधन र परिमार्जन गरी मिलाइएको रूपमा) को धारा २४ (३) बमोजिम केन्द्रीय कार्यसमितिका सदस्य श्री विश्वप्रकाश शर्मालाई पार्टीको प्रवक्ता पदमा मनोनयन गर्नुभएको उल्लेख गरिएको छ ।
नेपाल विद्यार्थी संघको अध्यक्ष रही सक्नुभएका शर्मा प्रखर वक्ता र शालिन व्यक्तित्वका धनी मानिन्छन् ।
रेडियो नेपालको घट्ना र विचार कार्यक्रमका प्रस्तोता समेत रहिसकेका शर्मा सञ्चार जगतका लागि उत्तिकै सहयोगी हुने अपेक्षा गरिएको छ ।
नेपाली कांग्रेसका केन्द्रीय सदस्य शर्मा हालै सम्पन्न प्रतिनिधिसभाको निर्वाचनमा झापाबाट नेपाली कांग्रेसको प्रत्याशी बनेका थिए । उनी बामगठबन्धनका तर्फबाट उम्मेद्वारी दिएका नेकपा माओवादीका नेता राम कार्की उर्फ सुरेन्द्र कार्कीबाट थोरै मतले पराजित भएका थिए ।
