बंगलोर(भारत), १२ माघ । भारतीय महिला फुटबल लिग(इण्डियन वुमन्स लिग, आईलिग)को खेलमा छानिएको नेपाली खेलाडीहरु अम्बिका बस्नेत र सावित्रा भण्डारीले पहिलो खेलदेखि नै जादू देखाउन थालेका छन् ।
नेपाली महिला फुटबल खेलमा साम्बा उपनामले चिनिने नेपाली राष्ट्रिय टोलीकी स्ट्राइकर सावित्रा भण्डारीले आइतबार सम्पन्न खेलमा एक निर्णायक गोल गरेर आफ्नो टिमलाई विजयी बनाएकी छिन्।
उनको निर्णायक गोल मद्दतमा उनको टोली गोकुलम केरला एफसीले आइतबार सम्पन्न खेलमा श्रीभुमी एफसीलाई १-० ले पराजित गरेको छ। ब्याङग्लोर फुटबल स्टेडियममा सम्पन्न खेलमा सावित्राले ६७औं मिनेटमा निर्णायक गोल गरेकी थिइन्।
गतहप्ता भारत गएकी सावित्राले यसअघि छनोट चरणको अन्तिम खेलमा गत बुधबार समेत २ गोल गरेकी थिइन्। गत संस्करण सेथु एफसीबाट खेलेकी सावित्राले यो सिजन गोकुलम एफसीबाट मैदान उत्रिएकी हुन्।
आईलिगमा सावित्राले ७ नम्बरको जर्सीमा मैदान उत्रिने छिन्। गत संस्करण सेथु एफसीमा आबद्ध भएकी सावित्राले टोलीलाई लिग च्याम्पियन बनाउन ३ ह्याट्रिकसहित १५ गोल गरेकी थिइन्।
यसअघि नेपाली टोलीकै अर्की सदस्य अनिता बस्नेत सम्मिलित सेथु एफसीले विजयी सुरुवात गरिसकेको छ। शुक्रबार सोही मैदानमा भएको खेलमा सेथुले कोहलपुर सिटी एफसीलाई ५–० को फराकिलो अन्तरले हराएको हो।
