बुटवल, ७ माघ । पाँचौं टेन्सबर्ग फर्साटिकर कप नकआउट फुटबल प्रतियोगिताको उपाधि आयोजक फर्साटिकर युवा क्लबले जित्न सफल भएको छ ।
शनिवार फर्साटिकर उच्च माध्यमिक विद्यालयको खेलमैदानमा सम्पन्न फाइनल भिडन्तमा आयोजक फर्साटिकरले भैरव एफसी, नवलपरासीलाई पेनाल्टी शुटआउटमा ४–१ ले हराउँदै उपाधि जित्न सफल भएको हो ।
यसअघि निर्धारित समयको खेल दुवै टोलीले १–१ गोलको बराबरी खेलेका थिए । नियमित समयतर्फ फर्साटिकरका लागि उमेश थापाले गोल गरेका थिए भने भैरवका लागि जय गुरुङले गोल गरे ।
प्रतियोगिताको बिजेता बनेको आयोजक फर्साटिकरले उपाधिसहित नगद १ लाख २१ हजार हात पारेको छ ।
त्यस्तै उपविजेता बनेको भैरवले भने ६५ हजार प्राप्त गरेको छ ।
फाइनल खेलको म्यान अफ द म्याच फर्साटिकर युवा क्लबका गोलरक्षक बिष्णु पल्ली मगर घोषित भए भने प्रतियोगिताको सर्वाधिक गोलकर्ता आयोजक फर्साटिकरकै सुरज हमाल घोषित भए ।
त्यस्तै उत्कृष्ट गोलकिपर भैरव एफसिका प्रदिप भण्डारी, उदीयमान खेलाडी फर्साटिकर युवा क्लबका बिष्णु पल्ली मगर र सर्वोत्कृष्ट खेलाडी भैरव एफसिका बर्षात गुरुङ घोषित भए ।
प्रतियोगिताको फेयर प्ले पुरस्कार गोर्खा ब्वाईज क्लबले हासिल गर्यो ।
गत पौष २१ गतेदेखि शुरु प्रतियोगितामा रुपन्देही, कपिलवस्तु र नवलपरासीका गरी कुल १६ टोलीहरुले सहभागिता जनाएका थिए ।
