काठमाडौं, ११ श्रावण । साफ यू–२० च्याम्पियनसिपको दोस्रो खेलमा आज नेपाली टोली श्रीलङ्कासँग प्रतिस्पर्धा गर्दैछ ।
भारतको भुवनेश्वरमा सोमबारदेखि सुरु भएको च्याम्पियनसिपको पहिलो खेलमा नेपालले माल्दिभ्समाथि ४–० ले शानदार विजय हासिल गरेको थियो ।
नेपाली युवा टोली आज लगातार दोस्रो जित निकाल्ने लक्ष्यमा छ ।
नेपाली टोलीका प्रशिक्षक मेघराज केसीले पहिलो जितले खेलाडीमा हौसला मिलेको बताउनुभएको छ ।
हामी राम्रो तयारी गरेर भारत आएका छौं । हरेक खेलमा राम्रो गर्दै उपाधि जित्न चाहन्छौं,’ माल्दिभ्ससँगको खेलपछि केसीले भन्नुभएको छ ।
केसीले श्रीलङ्कासँग आत्मविश्वासका साथ जितका लागि खेल्ने पनि बताउनुभएको छ ।
प्रतियोगितामा आयोजक भारतसहित नेपाल, माल्दिभ्स, श्रीलङ्का र बङ्गलादेश सहभागी छन् । च्याम्पियनसिपमा नेपालले तेस्रो खेल आइतबार भारतसँग र चौथो खेल आउने मङ्गलबार बङ्गलादेशसँग खेल्नेछ ।
राउन्ड रोबिन लिगमा आधारमा खेलाईएको च्याम्पियनसिपको शीर्ष दुई टोलीबीच साउन २० गते उपाधिको लागि भिडन्त हुनेछ ।
साफ यू–२० च्याम्पियनसिप पहिलो पटक आयोजना भएको हो । साफले यस च्याम्पियनसिपलाई एएफसी यू–२० एसियन कप छनोट फुटबलको तयारी प्रतियोगिताको रुपमा पनि लिएको छ ।
नेपाल एसियन कप छनोटको समूह ‘बी’ मा परेको छ ।
नेपालको समूहमा कतार, बहराइन, भुटान र बङ्गलादेश छन् ।
छनोट खेल सेप्टेम्बर १० देखि १८ सम्म बहराइनमा हुनेछ ।
समूह विजेता टोलीले सन् २०२३ मा उज्वेकिस्तानमा आयोजना हुने यू–२० एसियन कपमा छनोट हुनेछन् ।
