टेक्सास(संयुक्त राज्य अमेरिका),२९ असोज । आइसीसी विश्वकप लिग २ अन्तर्गतको छनोट खेलका लागि संयुक्त राज्य अमेरिका पुगेको नेपाली राष्ट्रिय क्रिकेट टोली अहिले टेक्सासमा अभ्यासमा ब्यस्त रहेको छ ।
अमेरिकामा हुने आईसीसी विश्वकप लिग २ को त्रिकोणीय छनोट खेल पहिले नेपाली टिमले आयोजक अमेरिकी टिमसंग तीन टी २० अन्तर्राष्ट्रिय खेल खेल्ने भएको छ ।
यही शुक्रवारदेखि हुने सो खेल टेक्सासको ग्राण्ड प्रेरी मैदानमा हुने छ । श्रृखलाको दोस्रो खेल आइतबार र तेस्रो खेल सोमबार हुने छ ।
सो खेलको लगत्तै आईसीसी विश्वकप लिग २ अन्तरगत अमेरिका त्रिकोणात्मक ओडीआई श्रृखलाको छनोट खेल हुने छ ।
तालिकाअनुसार अमेरिका त्रिकोणात्मक ओडीआई श्रृखला कात्तिक ९ देखि १९ गतेसम्म आयोजना हुने छ । यो श्रृखलामा नेपाल, अमेरिका र स्कटल्यान्डको सहभागिता रहने छ ।
त्रिकोणात्मक श्रृखलामा नेपालको पहिलो खेल कात्तिक ११ गते अमेरिकासँग तथा दोस्रो खेल कात्तिक १३ गते स्कटल्यान्डसँग हुने छ ।
नेपालले तेस्रो खेलमा कात्तिक १७ गते अमेरिकासँग र चौथो तथा अन्तिम खेलमा कात्तिक १९ गते स्कटल्यान्डसँग खेल्ने छ ।
सिरिजको सबै खेल अमेरिकाको टेक्सासस्थित ह्युस्टनमा रहेको प्रेरी भ्यूमा हुनेछ। सबै खेल नेपाली समयअनुसार राति १०ः१५ बजे सुरु हुनेछ।
