न्यूयोर्क(संयुक्त राज्य अमेरिका), १५ कार्तिक (बीबीसी) । अमेरिकी अधिकारीहरुले न्यूयोर्कको म्यानह्याटनमा गराइएको ट्रक आक्रमणलाई ‘आतंकवादी कार्य’को संज्ञा दिएका छन्।
न्यूयोर्कमा सन् २००१ को सेप्टेम्बर ११ मा भएको हमलापछि आतंकवादसँग सम्बन्धित घटनामा मान्छेहरुले ज्यान गुमाएको यो पहिलो पटक हो।
न्यूयोर्क प्रहरीका अनुसार घटनाबारे थप अनुसन्धान भइरहेको छ।
स्थानीय समय अनुसार मंगलवार दिउँसो लोअर म्यानह्याटनमा एकजनाले फुटपाथ र साइकल लेनमा पिक-अप ट्रक जोताउँदा कम्तीमा आठजनाको ज्यान गएको छ।
पहिचान
घटनामा ११ जना गम्भीर घाइते भएको अधिकारीहरुले बताएका छन्।
अर्जेन्टिनाको विदेश मन्त्रालयले ज्यान गुमाउनेमध्ये पाँचजना आफ्नो मुलुकको भएको जनाएको छ।
त्यसैगरी बेल्जियम सरकारले मृतकमध्ये एकजना आफ्नो देशको भएको बताएको छ।
प्रहरी स्रोतका अनुसार २९ वर्षीय आक्रमणकारी सेफुलो साइपभ भएको पहिचान गरिएको छ।
निगरानी
उनी सन् २०१० मा उज्बेकिस्तानबाट अमेरिका पुगेको ठानिएको छ।
प्रहरीले गोली हानी नियन्त्रणमा लिएका ट्रक चालकको सुरक्षा निगरानीमा अस्पतालमा उपचार भइरहेको अधिकारीहरुले बताएका छन्।
अमेरिकी सञ्चारमाध्यमहरुका अनुसार तथाकथित इस्लामिक स्टेट समूहलाई उल्लेख गरिएको एउटा टिपोट उनको ट्रकबाट फेला पारिएको छ।
घटना लगत्तै भिडिओ खिचेका एकजना प्रत्यक्षदर्शीले आक्रमणपछिको दृश्य देखेर आफू ुस्तब्धु भएको बीबीसीलाई बताएका छन्।
कसले के भने ?
राष्ट्रपति डोनल्ड ट्रम्पले न्यूयोर्कमा ुदिमागी हालत ठीक नभएको एकजना गुण्डाबाट आक्रमण भएकोु प्रतिक्रिया दिएका छन्।
न्यूयोर्कको लोअर म्यानह्याटनमा एक व्यक्तिले फुटपाथ र साइकल लेनमा पिक-अप ट्रक जोताउँदा कम्तीमा आठजनाको ज्यान गएको छ भने ११ जना घाइते भएको अधिकारीहरुले बताएका छन्।
राष्ट्रपति ट्रम्पले कानून कार्यान्वयन गराउने निकायले घटनालाई नजिकबाट हेरिरहेको बताए।
उनले मध्यपूर्वमा तथाकथित इस्लामिक स्टेट समूह पराजित भएपछि उसलाई अमेरिका फर्किन वा प्रवेश गर्न दिन नहुने उल्लेख गरेका छन्।
कायरतापूर्ण
म्यानह्याटन आक्रमणपछि राष्ट्रपति ट्रम्पले अमेरिका आउने विदेशीहरुको जाँच प्रक्रियामा थप कडाई गर्न आन्तरिक सुरक्षासम्बन्धी मन्त्रालयलाई निर्देशन दिएका छन्।
ट्रम्प राष्ट्रपति भएपछि अमेरिकाले यसअघि नै त्यहाँ जाने विदेशीहरुको जाँच प्रक्रियामा कडाई गरिसकेको छ।
घटनालाई न्यूयोर्कका मेयर बिल डे ब्लाजिओले शहरको मुटुमा निर्दोष नागरिकलाई निशाना बनाउने उद्देश्यले गरिएको कायरतापूर्ण आतंककारी कार्यको संज्ञा दिएका छन्।
उनले भने, ‘हामीलाई थाहा छ कि हाम्रो मनोबल गिराउने नियतले यो कार्य गरिएको हो तर हामीलाई यो पनि थाहा छ कि न्यूयोर्कवासी बलिया छन्, असहज अवस्थाबाट छिट्टै सहज अवस्थामा फर्किनसक्ने खालका छन्।’
आग्रह
न्यूयोर्क राज्यका गभर्नर एन्ड्रिव क्वोमोले न्यूयोर्कवासीलाई नडराउन आग्रह गरेका छन्।
न्यूयोर्कका प्रहरी कमिसनर जेम्स ओनिलले न्यूयोर्कका धेरै मान्छे र परिवारलाई ठूलो पीडा दिने घटना भएको प्रतिक्रिया दिएका छन्।
ब्रिटिश प्रधानमन्त्री टरिजा मेले न्यूयोर्कलाई ब्रिटेनको साथ रहेको बताएकी छन्।
फ्रान्सका राष्ट्रपति एमानुएल माक्रोंले ऐक्यवद्धता जनाउँदै स्वतन्त्रताको लडाइँले फ्रान्सलाई अमेरिकासँग हालसम्मकै सबैभन्दा नजिक ल्याएको प्रतिक्रिया दिएका छन्।
