कीर्तिपुर(काठमाडौं), ४ पौष । सिद्धार्थ बैंक नेपाल प्रिमियर लिग(एनपीएल) को फाइनल प्रवेशका लागि दोस्रो क्वालिफायरमा कर्णाली याक्स र जनकपुर बोल्ट्सबीच आज भिडन्त हुँदै छ ।
दुई टोलीबीचको खेल कीर्तिपुस्थित त्रिभुवन विश्वविद्यालयको क्रिकेट मैदानमा मध्यान्ह १२ बजे सुरु हुदैछ ।
जनकपुर बोल्ट्स पहिलो क्वालिफायरमा सुदूरपश्चिम रोयल्ससँग पराजित भएर फाइनल प्रवेशका लागि अर्को अवसर पाएको हो । पहिलो क्वालिफायरको विजेता बन्दै सुदूरपश्चिमले भने फाइनलमा स्थान पक्का गरिसकेको छ ।
कर्णालीले भने बुधवार भएको इलिमिनेटर खेलको विजेता बन्दै दोस्रो क्वालिफायरमा स्थान बनाएको हो । कर्णालीले इलिमिनेटर खेलमा चितवन राइनोजमाथि २१ रनको जित हात पारेको थियो ।
कर्णाली र जनकपुरबीचको विजेताले फाइनलमा सुदूरपश्चिमसँग उपाधीको लागि खेल्नेछ । पराजित टोली भने प्रतियोगिताबाट बाहिरिने छ ।
लिगचरणको भेटमा कर्णाली जनकपुरसँग ८ विकेटले विजयी भएको थियो ।
पहिलो संस्करणको नेपाल प्रिमियर लिगको फाइनल खेल शनिवार मध्यान्ह १२ बजे त्रिभुवन विश्वविद्यालयको क्रिकेट मैदानमा हुनेछ ।
