काठमाडौँ, १३ पुसः निर्वाचन आयोगले आसन्न प्रतिनिधिसभा सदस्य निर्वाचनका लागि समानुपातिक निर्वाचन प्रणालीतर्फ मतदान गर्ने प्रयोजनका लागि अस्थायी मतदाता सङ्कलन सुरु गर्ने भएको छ ।
आयोगले मतदाता नामावली ऐन, २०७३ को दफा ३० तथा अस्थायी मतदाता नामावलीसम्बन्धी कार्यविधि, २०८२ बमोजिम आयोगबाट अस्थायी मतदाता नामावली सङ्कलन कार्यक्रम स्वीकृत गरेको हो ।
आयोगका प्रवक्ता नारायणप्रसाद भट्टराईका अनुसार अस्थायी मतदाता नामावलीमा नाम समावेश हुने मतदाताको विवरण यही पुस १९ देखि आगामी माघ १८ गतेसम्म सम्बन्धित निकायका कार्यालय प्रमुखले प्रमाणित गरी प्रमुख नाम दर्ता अधिकारी अधिकारी प्रदेश वा जिल्ला निर्वाचन अधिकारीको कार्यालयमा पठाउनुपर्नेछ ।
सङ्कलित नामावली प्रकाशन र दाबीविरोध तथा जाँचबुझ गरी अन्तिम अस्थायी मतदाता नामावली प्रकाशन गर्ने कार्यक्रम रहेको छ ।
आयोगबाट प्रकाशन भएको अन्तिम मतदाता नामावलीमा नाम समावेश भएका नेपाल सरकार, प्रदेश सरकार, स्थानीय तह तथा नेपाल सरकार वा प्रदेश सरकारको स्वामित्व वा नियन्त्रणमा रहेका संस्थामा कार्यरत कर्मचारी, व्यारेकमा रहेका नेपाली सेना, नेपाल प्रहरी र सशस्त्र प्रहरी बल नेपाल, कारागारमा रहेका थुनुवा र कैदी, नेपाल सरकार, प्रदेश सरकार वा स्थानीय तहले सञ्चालन गरेका वा नेपाल सरकार, प्रदेश सरकार वा स्थानीय तहको स्वीकृति लिइ सञ्चालनमा रहेका वृद्धा अवस्थामा बसेका व्यक्तिहरू एवं संवैधानिक निकायका पदाधिकारीको नामावली सङ्कलन गरिनेछ आयोगले जनाएको छ ।
कार्याविधिको दफा १४.मा अस्थायी मतदाता नामावलीको प्रयोगको विषय उल्लेख छ । सो दफामा यस कार्याविधि बमोजि तयार गरिएको अन्तिम अस्थायी मतदाता नामावली प्रतिनिधि सभा सदस्य निर्वाचनको समानुपातिक निर्वाचन प्रणाली अन्तरगत हुने निर्वाचनमा मतदान गर्ने प्रयोजनका लागि मात्र प्रयोग हुनेछ भनिएको छ।
यस अगाडिका चुनावमा यस्तो कार्याविधि बनाइएको थिएन । अस्थायी मतदाता नामावलीमा नाम भएका शिक्षक र कर्मचारीले स्वविवेकले मतदान गर्ने भएपनि सेना,प्रहरी,थुनुवा र बृद्धाश्रमका भोटहरु सरकारी निर्देशनले प्रभावित हुने देखिन्छ । निर्वाचन आयोगको यो कदम व्यक्तिगत मताधिकारका लागि महत्वपूर्ण कदम मानिए पनि सरकारले र संबन्धित विभागीय नेतृत्वले यसको दुरुपयोग गर्ने संभावना बढी छ । यसलाई पञ्चायतकालीन सरकारी उम्मेद्वारलाई सरकारी निकायले सघाउने शैलीलाई सुशीला सरकारले आयोगमार्फत पुनरावृत गराउन खोजेको आरोप पनि लगाइएको छ ।
