• टम्बलर रिज, क्यानडा

ब्रिटिस कोलम्बिया(क्यानडा), २८ माघ । क्यानडाको ब्रिटिस कोलम्बिया प्रान्तस्थित एक ग्रामीण पहाडी सहरको माध्यमिक विद्यालय र एउटा घरमा भएको अन्धाधुन्ध गोली काण्डमा कम्तीमा नौ जनाको मृत्यु भएको छ।

दशकौँपछि भएको यो विद्यालय तहको सबैभन्दा घातक आक्रमण हो।

स्थानीय समयअनुसार मङ्गलवार दिउँसो करिब १ः२० बजे प्रान्तको उत्तर पूर्वी क्षेत्रमा पर्ने टम्बलर रिज सहरस्थित विद्यालयमा बन्दुकधारीले गोली चलाएका थिए।

रोयल क्यानेडियन माउन्टेड पुलिस (आरसीएमपी) का अनुसार विद्यालय परिसरमै ६ जनाको शव फेला परेको थियो। थप एक जनाको अस्पताल लैजाँदै गर्दा बाटोमै मृत्यु भएको थियो।

यसैगरी, उक्त घटनासँगै सम्बन्धित मानिएको नजिकैको एक घरमा थप दुई जना मृत फेला परेको प्रहरीले जनाएको छ।

आक्रमणकारीद्वारा आत्महत्या

प्रहरीका अनुसार सन्दिग्ध बन्दुकधारी विद्यालय परिसरभित्रै मृत अवस्थामा फेला परेका छन्। उनले आफैँलाई गोली हानी आत्महत्या गरेको प्रारम्भिक अनुसन्धानबाट देखिएको छ। सीबीसी न्युजका अनुसार आपत्कालीन सन्देशमार्फत सर्वसाधारणलाई सन्दिग्ध व्यक्तिको हुलिया खैरो कपाल भएको र विशिष्ट पोसाक लगाएकी महिलाको रूपमा दिइएको थियो।

यस घटनामा दुई जना गम्भीर घाइते भएका छन् भने अन्य २५ जनाको स्थानीय चिकित्सा केन्द्रमा उपचार भइरहेको छ। टम्बलर रिज माध्यमिक विद्यालयमा कक्षा ७ देखि १२ सम्मका १ सय ७५ विद्यार्थी अध्ययनरत छन्।

आक्रमणको कारण अज्ञात

उत्तरी जिल्ला कमाण्डर सुपरिटेन्डेन्ट केन फ्लोयडले पत्रकार सम्मेलनमा घटनाको उद्देश्य अझै स्पष्ट नभएको बताउनुभयो। ूयो त्रासदी कुन कारणले प्रेरित भएको हो भन्नेबारे हामी अहिले नै केही भन्न सक्ने अवस्थामा छैनौँ,ू उहाँले भन्नुभयो, ूमृतकमध्ये कति बालबालिका हुन् र आक्रमणकारीसँग उनीहरूको के सम्बन्ध थियो भन्नेबारे अनुसन्धान भइरहेको छ।ू प्रहरीले आक्रमणकारीको पहिचान भइसकेको बताए पनि गोपनीयताका कारण विवरण सार्वजनिक गरेको छैन।

क्यानडामा विरलै हुने यस्ता घटना

अमेरिकाको तुलनामा बन्दुकसम्बन्धी कडा कानुन भएको क्यानडामा सामूहिक गोली काण्डका घटनाहरू असाधारण मानिन्छन्। यसअघि सन् १९८९ मा मोन्ट्रियलको इकोल पोलिटेक्निकमा १४ महिलाको हत्या भएको थियो, जसले क्यानडामा बन्दुक नियन्त्रण कानुनलाई थप कडा बनाउन ठुलो भूमिका खेलेको थियो।

राष्ट्रिय शोक र समवेदना

ब्रिटिस कोलम्बियाका प्रिमियर डेभिड एबीले यसलाई ुअकल्पनीय र विनाशकारी त्रासदीु को संज्ञा दिनुभएको छ। क्यानडाका प्रधानमन्त्री मार्क कार्नीले सामाजिक सञ्जालमार्फत शोक व्यक्त गर्दै भन्नुभएको छ, ूयस भयानक हिंसामा आफ्ना प्रियजन गुमाएका परिवारहरूप्रति मेरो गहिरो समवेदना छ।ू

घटनापछि टम्बलर रिजका प्राथमिक र माध्यमिक दुवै विद्यालयहरू यस हप्ताका लागि बन्द गरिएको छ। प्रहरीले हाललाई सर्वसाधारणका लागि थप खतरा नरहेको स्पष्ट पारेको छ।