बाँके १ मा राष्ट्रिय स्वतन्त्र पार्टी (रास्वपा)का सुरेशकुमार चौधरी प्रतिनिधिसभा सदस्यमा निर्वाचित हुनुभएको छ ।  बिहीबार सम्पन्न प्रतिनिधिसभा सदस्य निर्वाचनको अन्तिम मतपरिणाम अनुसार उहाँले ३२ हजार ७९२ मत प्राप्त गर्नुभएकोे निर्वाचन अधिकृत शरोजनिधि वाग्लेले जानकारी दिनुभयो ।

चौधरीको निकटतम प्रतिष्पर्धिमा नेपाली कांग्रेसका नारायण गौडेलले १५ हजार ३०१ मत प्राप्त गर्नुभएको छ । यसैगरि नेकपा (एमाले)का सूर्य ढकालले ११ हजार १५ मत प्राप्त गर्नुभएको निर्वाचन अधिकृत वाग्लेले  बताउनुभयो ।

प्रतिनिधि सभा निर्वाचन २०८२ मा मोरङ ६ मा राष्ट्रिय स्वतन्त्र पार्टीका रूविना आचार्य विजयी हुनुभएको छ।

उहाँले ५५ हजार ५ सय १३ मत प्राप्त गरेर विजयी भएको निर्वाचन कार्यालयले जनाएको छ।

उहाँका निकटतम प्रतिस्पर्धी कांग्रेसका शेखर कोइरालाले १२८५० मत प्राप्त गर्नुभयो।

रूविनाले कोइरालालाई ४२ हजार ६ सय ६३ मतान्तरले पराजित गर्नुभएको हो ।

धनुषा ३ बाट मनिष झा विजयी

प्रतिनिधि सभा निर्वाचन २०८२ मा मधेश प्रदेशको धनुषा ३ मा राष्ट्रिय स्वतन्त्र पार्टीका प्रवक्ता मनिष झा विजयी हुनुभएको छ ।

उहाँले ४३ हजार ९ सय ८८ मत ल्याएर विजयी हुुनुभएको हो। उहाँले निकटतम प्रतिद्वन्द्वी नेपाली कांग्रेसका पूर्वमहामन्त्री विमलेन्द्र निधिलाई २७ हजार ६ सय ५२ मतले उछिन्नुभएको छ।

निधिले १६ हजार ३ सय ३६ मत पाउनुभएको छ। यसअघि निधि र झा दुवै समानुपातिक तर्फबाट प्रतिनिधिसभा सदस्य हुनुहुन्थ्यो।

निधिले जित्दै आएको यो क्षेत्रमा यसअघि एमालेकी जुली महतोले जित्नुभएको थियो। यसपालि पनि महतो यो क्षेत्रमा प्रतिस्पर्धामा हुनुहुन्थ्यो।

काठमाडौं ४ मा पुकार बम विजयी

काठमाडौं क्षेत्र नं. ४ बाट राष्ट्रिय स्वतन्त्र पार्टी (रास्वपा) का उम्मेदवार पुकार बम विजयी हुनुभएको छ।

उहाँ २० हजार ३१८ मतान्तरले विजयी हुनुभएको हो।

उहाँले २९ हजार १ सय ४२ मत ल्याउनुभएको छ भने उहाँका निकट प्रतिद्वन्द्वी नेपाली कांग्रेसका उम्मेदवार सचिन तिमल्सेनाले ८ हजार ८ सय २४ मत प्राप्त गर्नुभएको छ।

मोरड. ४ बाट सन्तोष राजवंशी निर्वाचित

प्रतिनिधि सभा निर्वाचन २०८२ मा मोरङ क्षेत्र नम्बर ४ मा राष्ट्रिय स्वतन्त्र पार्टी (रास्वपा) का उम्मेदवार सन्तोष राजवंशी विजयी हुनुभएको छ ।

उहाँ २८,०१५ मतान्तरले विजयी भएको निर्वाचन अधिकृत घनेन्द्र अधिकारीले जानकारी दिनुभयो।

अधिकारीका अनुसार सन्तोषले ४० हजार ८ सय ३३ मत प्राप्त गर्नुभयो। उहाँका निकटतम प्रतिस्पर्धी नेपाली कांग्रेसका उम्मेदवार गुरुराज घिमिरे १२ हजार ८ सय १८ मत प्राप्त गर्नुभयो। घिमिरे कांग्रेसका महामन्त्री हुनुहुन्छ ।

 प्रतिनिधिसभा सदस्यका निर्वाचनमा कास्की क्षेत्र नम्बर २ मा राष्ट्रिय स्वतन्त्र पार्टी (रास्वपा) का उम्मेदवार उत्तमप्रसाद पौडेल ३१ हजार ९११ मतसहित विजयी हुनुुभएको छ ।

यस क्षेत्रमा नेकपा (एमाले)का रश्मी आचार्यले सात हजार ४९३ मतसहित दोस्रो बन्नुुभयो भने नेपाली कांग्रेसका माधवप्रसाद बास्तोला छ हजार ५०० मतसहित तेस्रो बन्नुुभएको निर्वाचन अधिकृतको कार्यालयले जनाएको छ ।

यसैगरी राष्ट्रिय प्रजातन्त्र पार्टीका हेमजङ गुरुङले एक हजार ६४३ मत, नेपाली कम्युनिष्ट पार्टीका हेमबहादुर थापा पराजुलीले एक हजार २७६ मत, उज्यालो नेपाल पार्टीका कुशल गुरुङले एक हजार २०१ मत प्राप्त गर्नुुभएको कार्यालयले जनाएको छ ।

–––

काठमाडौँ क्षेत्र नं ५ मा प्रतिनिधिसभा सदस्यमा राष्ट्रिय स्वतन्त्र पार्टी (रास्वपा)का उम्मेदवार सस्मित पोखरेल निर्वाचित हुनु भएको छ । बिहीबार सम्पन्न प्रतिनिधिसभा सदस्य निर्वाचनको अन्तिम मतपरिणाम अनुसार उहाँले ३० हजार सात सय ३७ मत प्राप्त गरी विजयी हुनु भएको छ ।

नवनिर्वाचित सांसद पोखरेलका प्रतिस्पर्धी नेपाली कांग्रेसका प्रदीप पौडेलले  नौ हजार एक सय ५९ मत प्राप्त गर्नुभएको छ ।  निर्वाचन अधिकृतको कार्यालयका अनुसार  निर्वाचनमा नेकपा(एमाले)का ईश्वर पोखरेलले चार हजार सात सय एक मत प्राप्त गर्नुभएको छ ।

राष्ट्रिय प्रजातन्त्र पार्टीका कमल थापाले एक हजार सात सय २९, उज्यालो नेपाल पार्टीका श्रीराम गुरुङले एक हजार एक सय, श्रम संस्कृति पार्टीका अमित थापाले सात सय ११ मत प्राप्त गर्नुभएको छ । सो निर्वाचन क्षेत्रमा विभिन्न राजनीतिक दल र स्वतन्त्र गरी कूल २५ उम्मेदवार प्रतिस्पर्धामा हुनुहुन्थ्यो ।

नवनिर्वाचित सांसद  पोखरेलले मतदाताले देखाएको विश्वासले आफूहरु अत्यन्तै कृतज्ञ भएको उल्लेख गर्दै यो परिणाम कुनै व्यक्तिगत विजय नभई यस क्षेत्रका नागरिकप्रतिको ठूलो जिम्मेवारी भएको बताउनुभयो ।  “आजबाट हाम्रो कर्तव्य अझ ठूलो भएको छ । वास्तविक विजय आज होइन । आगामी पाँच वर्षमा जनताको विश्वास जोगाएर, इमानदारीका साथ काम गरेर, परिवर्तनको परिणाम देखाउन सकेपछि मात्र हाम्रो विजय पूर्ण हुनेछ ” उहाँले भन्नुभयो ।

कास्की क्षेत्र नं ३ बाट राष्ट्रिय स्वतन्त्र पार्टी (रास्वपा)का बिना गुरुङ विजयी बन्नुुभएको छ । बिहीबार सम्पन्न प्रतिनिधिसभा सदस्यको निर्वाचनमा गुरुङले ३७ हजार ७५० मत सहित विजयी बन्नुुभएको मुख्य निर्वाचन अधिकृतको कार्यालय कास्कीले जनाएको छ ।

निर्वाचनमा नेपाली कांग्रेसका मनोज गुुरुङ १२ हजार ७८० मत सहित दोस्रो बन्नुुभयो भने नेकपा (एमाले)का दामोदर बैरागी सात हजार ९०६ मत सहित तेस्रो बन्नुुभएको छ । त्यस्तै निर्वाचनमा नेपाली कम्युनिष्ट पार्टीका गोपाल गिरीले एक हजार ४५६ मत, राष्ट्रिय प्रजातन्त्र पार्टीका अर्जुनप्रसाद खनालले एक हजार ४०६ मत, श्रम संस्कृति पार्टीका हितकाजी गुरुङले ५८६, उज्यालो नेपाल पार्टीका तर्कबहादुर गुरुङले ४६२ मत  प्राप्त गर्नुभएको छ ।

कास्की ३ मा १ लाख ७ हजार ५ सय ६० मतदाता रहेकामा ६५ हजार ४ सय ७  मत खसेको थियो । निर्वाचित सांसद गुरूङ रास्वपाकी गण्डकी प्रदेश कोषाध्यक्षसमेत हुनुहुन्छ ।

काठमाडौँ, २२ फागुनः काठमाडौँ क्षेत्र नं ७ मा राष्ट्रिय स्वतन्त्र पार्टी (रास्वपा)का गणेश पराजुली निर्वाचित हुनुभएको छ ।  निर्वाचन आयोगका अनुसार पराजुलीले २७ हजार आठ सय पाँच मत प्राप्त गर्नुभएको छ ।

निर्वाचन अधिकृत सविता शर्माका अनुसार सो क्षेत्रमा नेपाली कांग्रेसका प्रमोदहरि गुरागाईले तीन हजार नौ सय ८२ मत, नेकपा (एमाले)का प्रकाश श्रेष्ठले तीन हजार पाँच सय ४४, नेपाली कम्युनिस्ट पार्टीका वसन्तप्रसाद मानन्धरले तीन हजार छ सय ६७ मत प्राप्त गर्नुभएको छ ।

सो निर्वाचन क्षेत्रमा विभिन्न राजनीतिक दलसहित २७ उम्मेदवार प्रतिस्पर्धामा हुनुहुन्थ्यो ।

 प्रतिनिधिसभा सदस्य निर्वाचनमा काठमाडौं निर्वाचन क्षेत्र नं १० मा राष्ट्रिय स्वतन्त्र पार्टी (रास्वपा)का प्रदीप विष्ट विजयी हुनुभएको छ । उहाँले   ३७ हजार ४  सय ६९  मत प्राप्त गर्नु भएको  छ । निकट प्रतिद्वन्द्वी  नेपाली काङ्ग्रेसका  हिमाल कार्कीले   ८  हजार  १ सय निर्वाचन अधिकृतको कार्यालयले जनाएको छ ।

निर्वाचन अधिकृत अमृताकुमारी  शर्माका अनुसार   खसेको कुल मत मध्ये दुई हजार ९३ मत बदर भएको छ ।  सो क्षेत्रको समानुपातिक तर्फको मत शनिबारबाट गणना गरिने जानकारी   समेत उहाँले दिनुभयो ।

नवनिर्वाचित सांसद विष्टको जन्म कीर्तिपुर नगरपालिका वडा ४ मा विसं २०३१ भएको थियो । उहाँ यस अघिको प्रतिनिधिसभा सदस्य निर्वाचनमा रास्वपाको उम्मेदवार समेत हुनुहुन्थ्यो ।

काठमाडौँ, २२ फागुनः प्रतिनिधिसभा सदस्य निर्वाचनमा काठमाडौँ क्षेत्र नं ३ बाट रास्वपाका उम्मेदवार राजुनाथ पाण्डेले १८ हजार ७५७ मत प्राप्त गरेर विजयी हुनुभएको छ । उहाँका प्रतिस्पर्धी उज्यालो नेपाल पार्टीका कुलमान घिसिङले ११ हजार १७१ मत प्राप्त गर्नुभएको छ भने नेपाली कांग्रेसका रमेश अर्यालले ६ हजार मत प्राप्त गर्नुभएको निर्वाचन अधिकृत चमिला भट्टराईले जानकारी दिनुभयो ।

त्यसैगरी नेपाल कम्युनिष्ट पार्टी (एमाले)का रामेश्वर फुयालले तीन हजार ८१६ मत प्राप्त भएको छ ।  काठमाडौँ महानगरका पूर्वप्रहरी प्रमुख पाण्डेले स्नात्तकोत्तर गर्नुभएको छ । उहाँको ३० वर्षभन्दा बढी सार्वजनिक सेवा, सुरक्षा र प्रशासनिक व्यवस्थापनमा अनुभव रहेको छ ।