वाशिंटन डीसी(संयुक्त राज्य अमेरिका), १७ चैत्र(बीबीसी) । संयुक्त राज्य अमेरिकाका राष्ट्रपति डोनल्ड ट्रम्पले चाँडै कुनै सम्झौता नभए इरानका विद्युत् उत्पादन गर्ने केन्द्र र तेलखानीसहितका संरचनाहरू ध्वस्त पारिदिने चेतावनी दिएका छन्।
यद्यपि उनले अमेरिकाले इरानको नयाँ सत्तासँग गम्भीर कुराकानी गरिरहेको र त्यसबाट इरानमा जारी अमेरिकी सैन्य कारबाही टुङ्ग्याउने सम्भावना रहेको दाबी पनि गरेका छन्।
सामाजिक सञ्जाल ट्रूथ सोशलमा उहाँले लेख्नुभएको छ, “अमेरिका एउटा नयाँ र अधिक समझदार सत्तासँग सैन्य कारबाही समाप्त गर्नेबारे गम्भीर छलफलमा छ।”
“निकै प्रगति भएको छ र सम्भवतस् सम्झौता हुन्छ तर यदि कुनै कारणले चाँडै हुन सकेन भने र व्यापारका निम्ति तत्काल होर्मुज जलमार्ग खोलिएन भने हामी इरानमा आफ्नो उपस्थितिलाई अहिलेसम्म हामीले सदाशयसहित नछोएका उनीहरूका सबै विद्युत् उत्पादन गर्ने केन्द्रहरू, तेलखानीहरू, खार्ग टापु (र सम्भवतः पानी प्रशोधनकेन्द्रहरू) लाई पूरै ध्वस्त पारिदिन्छौँ।”
यसबीचमा इरान, लेबनान र इजरायलमा नयाँ हमलामा नयाँ हमलाका विवरणहरू आइरहेका छन्। त्यस्तै स्ट्रेट अफ होर्मुजमा पानीजहाजहरूको आवतजावत युद्धपूर्वको तुलनामा निकै कम रहेको बताइएको छ।
यी घटनाक्रमबीच एशियाली बजारमा मङ्गलवार पनि तेलको मूल्य बढेको विवरण आएको छ। अमेरिकी कारोबारको तेलको मूल्य तीन प्रतिशतले बढेर झन्डै १०६ अमेरिकी डलर प्रतिब्यारल पुगेको बताइएको छ।
युद्धबारे अमेरिका
ह्वाइट हाउसकी प्रेस सेक्रेटरी क्यारोलिन लेभिटले एउटा प्रेस ब्रीफिङमार्फत् इरान युद्धबारे जानकारी गराउनुभएको छ।
अमेरिकाले अहिलेसम्म १ हजारभन्दा अधिक स्थानलाई निसाना बनाएको र १ सय ५० वटाभन्दा धेरै जहाजमा क्षति पुर्याउँदै इरानी जलसेनालाई तहसनहस पारेको दाबी गर्नुभएको छ ।
ट्रम्पले इरानी भूमिमा सेना तैनाथ गराउने सम्भावनालाई अस्वीकार नगरे पनि उहाँले अहिले पनि ट्रम्पको प्राथमिकता कूटनीति नै भएको तर्क गर्नुभयो।
प्रेस सेक्रेटरीले अमेरिका र इरानबीचको वार्ता जारी रहेको र राम्रोसँग चलेको पनि बताउनु भयो।
साथै उनले इरानले अमेरिकासँग सम्झौता गर्ने यो अवसर गुमाए गम्भीर परिणाम भोग्नुपर्ने चेतावनी पनि दिनुभयो।
तर इरानी अधिकारीहरूले भने अमेरिकासँग वार्ता चलिरहेको भन्ने विवरणको फेरि खण्डन गरेका छन्।
विदेशमन्त्रीका प्रवक्ता इस्माइल बाकाईले युद्ध सुरु भएयताको अवधिको चर्चा गर्दै इरानले यी ३१ दिनमा अमेरिकासँग कुनै कुराकानी नगरेको दाबी गर्नुभएको छ ।
यसअघि इरानी अधिकारीहरूले युद्ध समाप्त गर्न अमेरिकाले अघि सारेको मागलाई अतिशय र अनुचित भनेका थिए।
उनीहरूले अन्तर्राष्ट्रिय बजारमा तेलको मूल्यलाई प्रभावित तुल्याउन वार्ताबारे मिथ्या दाबी प्रचारप्रसार गरिने गरेको दाबी गरेका थिए।
नेतन्याहूको भनाइ
यी घटनाक्रमका बीचमा इजरायली प्रधानमन्त्री बेन्जमिन नेतन्याहूले युद्ध निश्चित रूपमा आधाभन्दा अघि बढिसकेको बताउनुभएको छ।
तर उहाँले युद्ध समाप्तिको समयसीमा भने तय गर्न नचाहेको बताउनुभयो।
नेतान्याहुले इरानको इस्लामिक गणतन्त्र इरान अन्ततः आन्तरिक रूपमै पतन हुने टिप्पणी गर्नुभएको समाचारसंस्था एएफपीको विवरणमा भनिएको छ।
