बेनी(म्याग्दी),३ आषाढ । नेपाल उद्योग वाणिज्य महासंघका निवर्तमान अध्यक्ष चन्द्रप्रसाद ढकाल नेतृत्वको आइएमई ग्रुपले म्याग्दीमा अर्को नयाँ जलविद्युत् आयोजना निर्माण गर्ने भएको छ ।

जिल्लाको अन्नपूर्ण गाउँपालिकामा ग्रुपले ६६ मेगावाट क्षमताको तिप्लाङ कालीगण्डकी जलविद्युत आयोजना निर्माण थालेको छ ।

तिप्लाङ कालीगण्डकी हाइड्रोपावर कम्पनी र नेपाल विद्युत् प्राधिकरणबीच २०८० भदौ २२ मा पीपीए सम्झौता सम्पन्न भइ आयोजना निर्माण प्रक्रिया अघि बढेको हो ।

हाल आयोजना निर्माणस्थलमा पुग्नुभएका आइएमई ग्रुपका अध्यक्ष चन्द्र ढकालले सामाजिक सञ्जालमार्फत भन्नुभएको छ,‘हामीले म्याग्दी जिल्लाको अन्नपूर्ण गाउँपालिकामा ६६ मेगावाट क्षमताको तिप्लाङ कालीगण्डकी जलविद्युत आयोजना निर्माण प्रक्रिया अगाडि बढाएका छौं।’

उहाँले यो आयोजना केवल ऊर्जा उत्पादनको परियोजना मात्र नभई यस क्षेत्रको सामाजिक–आर्थिक रूपान्तरणको आधार बन्ने बताउनुभएको छ। उहाँका अनुसार यो आयोजनाले स्थानीय रोजगारी सिर्जना गर्ने, सडक तथा अन्य पूर्वाधार विस्तार गर्ने, व्यवसायिक गतिविधि बढाउने र समग्र क्षेत्रीय विकासमा सकारात्मक प्रभाव पार्नेछ।

अध्यक्ष ढकालका अनुसार आयोजनाका लागि आवश्यक वित्तीय व्यवस्थापनलगायका काम सम्पन्न भइसकेको छ ।

आइएमई ग्रुपले यसअघि लमजुङ जिल्लामा २७ मेगावाट क्षमताको दोर्दी खोला जलविद्युत आयोजना र म्याग्दी जिल्लामा ४२ मेगावाट क्षमताको मिस्त्री खोला जलविद्युत आयोजना निर्माण सम्पन्न गरी व्यवसायिक रुपमा विद्युत् उत्पादन सुरु गरिसकेको छ ।

आइएमई ग्रुपले नेपालको स्वच्छ ऊर्जा र आर्थिक समृद्धिको यात्रालाई थप मजबुत बनाउँदै, जलविद्युत विकासप्रतिको आफ्नो प्रतिबद्धतालाई अझै फराकिलो र सशक्त बनाएको छ।

नेपाल जलस्रोतका दृष्टिले विश्वकै धनी राष्ट्रहरूमध्ये एक हो। प्रारम्भिक अध्ययनमा नेपालमा करिब ८३,००० मेगावाट जलविद्युत उत्पादनको सैद्धान्तिक सम्भावना देखिएको थियो । तर त्यसबेला अनुमान गरिएका आयोजनाहरु तीन गुणा बढी क्षमतामा बन्दै गएकोले यो संभावना बढ्दै गएको पनि देखिन्छ ।

विद्युत विकासको अपार सम्भावनालाई राष्ट्रको समृद्धिसँग जोड्ने उद्देश्यका साथ आइएमई ग्रुपले ऊर्जा क्षेत्रमा निरन्तर लगानी गर्दै आएको छ।नेपालको आर्थिक रूपान्तरण, औद्योगिक विकास र दीर्घकालीन समृद्धिको आधार स्वदेशी जलविद्युत भएको आईएमई ग्रुपको विश्वास छ ।

ग्रुपका अध्यक्ष ढकालले भन्नुभएको छ, “यस यात्रामा हामीले महत्वपूर्ण उपलब्धिहरू हासिल गरेका छौं। यसअघि हामीले लमजुङ जिल्लामा २७ मेगावाट क्षमताको दोर्दी खोला जलविद्युत आयोजना तथा म्याग्दी जिल्लामा ४२ मेगावाट क्षमताको मिस्त्री खोला जलविद्युत आयोजना सफलतापूर्वक निर्माण गरी व्यावसायिक उत्पादन सुरु गरिसकेका छौं। यी आयोजनाहरूले राष्ट्रिय विद्युत प्रणालीमा स्वच्छ ऊर्जा थप्नुका साथै स्थानीय स्तरमा रोजगारी, पूर्वाधार विकास तथा आर्थिक गतिविधि विस्तारमा समेत महत्वपूर्ण योगदान पुर्याएका छन्।”

नेपाल उद्योग वाणिज्य महासंघका निवर्तमान अध्यक्ष ढकालले भन्नुभएको छ, “हामी जलविद्युतलाई नेपालको विकासको मेरुदण्डका रूपमा हेर्छौं। जलविद्युत केवल बिजुली उत्पादन गर्ने माध्यम मात्र होइन, यो उद्योग सञ्चालन गर्ने शक्ति हो, कृषि आधुनिकीकरणको आधार हो, डिजिटल सेवा प्रवाहको ऊर्जा हो र समग्र आर्थिक गतिविधिलाई चलायमान बनाउने प्रमुख स्रोत हो। जसरी उद्योगका लागि कच्चा पदार्थ आवश्यक हुन्छ, त्यसरी नै आधुनिक अर्थतन्त्रका लागि ऊर्जा अपरिहार्य हुन्छ। पर्याप्त र भरपर्दो विद्युत् आपूर्तिविना तीव्र आर्थिक विकासको परिकल्पना गर्न सकिँदैन।”

आईएमई ग्रुपका अध्यक्ष ढकालले नेपाल ऊर्जा क्षेत्रमा आत्मनिर्भरतातर्फ अघि बढिरहेको बताउँदै भन्नुभएको छ, “आगामी दिनमा थप जलविद्युत उत्पादन गरी राष्ट्रिय प्रसारण प्रणालीलाई सुदृढ बनाउनुका साथै छिमेकी मुलुकहरूमा विद्युत निर्यात गर्ने ठूलो सम्भावना रहेको छ। यसबाट विदेशी मुद्रा आर्जन, व्यापार घाटा न्यूनीकरण तथा राष्ट्रिय अर्थतन्त्र सुदृढीकरणमा महत्वपूर्ण योगदान पुग्नेछ। निजी क्षेत्रको सक्रिय सहभागिता र सरकारको सहकार्यबाट नेपाललाई ऊर्जा सम्पन्न राष्ट्रका रूपमा स्थापित गर्न सकिन्छ भन्नेमा हामी विश्वस्त छौं।”

“आइएमई ग्रुप राष्ट्र निर्माणका यस्ता दीर्घकालीन र रणनीतिक क्षेत्रहरूमा लगानी गर्दै नेपालको समृद्धिको यात्रामा साझेदार बन्न प्रतिबद्ध छ।”, अध्यक्ष ढकालले भन्नुभएको छ,” स्वच्छ ऊर्जा उत्पादन, दिगो विकास, रोजगारी सिर्जना तथा आर्थिक रूपान्तरणमार्फत समुन्नत नेपाल निर्माणमा हाम्रो योगदानलाई आगामी दिनमा अझ सशक्त बनाउँदै लैजानेछौं।”