काठमाडौं, १३ कार्तिक । नेपाल पत्रकार महासंघले समाचार कक्षबाटै पत्रकारहरूलाई पक्राउ गर्ने कार्यप्रति कडा आपत्ति जनाउँदै यसलाई तत्काल बन्द गर्न सरकारसँग जोडदार माग गरेको छ।
समाचारको विषयलाई लिएर विभिन्न सञ्चारगृहमा प्रहरी प्रवेश गरी पत्रकारलाई नियन्त्रणमा लिइएको घटनाले प्रेस स्वतन्त्रतामाथि गम्भीर प्रहार भएको महासंघको ठहर छ।
नेपाल पत्रकार महासंघका महासचिव रामप्रसाद दाहालले समाचार कक्षबाटै पत्रकारहरूलाई नियन्त्रणमा लिने कार्यलाई ‘राज्य आतंक’ को संज्ञा दिनुभएको छ।
बर्दीधारी तथा सादा पोसाकका प्रहरीहरू सिधै समाचार कक्षमा प्रवेश गरेर पत्रकारलाई उठाउने कदम नेपालको संविधान, पूर्ण प्रेस स्वतन्त्रता र अन्तर्राष्ट्रिय कानुनहरूको समेत खुलेआम उल्लङ्घन भएको उहाँले बताउनुभएको छ। राज्यको यो आतंककारी शैली तत्काल नरोकिए यस खेदजनक कार्यविरुद्ध कडा आन्दोलनमा उत्रनुको विकल्प नहुने चेतावनी पनि उहाँले दिनुभएको छ।
शुक्रवार प्रहरीले नयाँ बानेश्वरस्थित ‘नेपाल प्रेस’ को कार्यालयको समाचार कक्षबाटै पत्रकार विश्वमणि सुवेदीलाई नियन्त्रणमा लिएको छ। त्यस्तै, अपराध अनुसन्धान कार्यालय टेकुबाट सादा पोसाकमा खटिएका पाँच जना प्रहरीको टोली ‘नयाँ पत्रिका दैनिक’ को कार्यालयमा पुगेर संवाददाता नवराज मैनालीलाई साइबर ब्यूरोमा लैजानुपर्ने भन्दै दबाब दिएको नयाँ पत्रिकाका सम्पादक खगेन्द्र पन्तले जानकारी दिनुभएको छ।
यसैगरी, शुक्रवार नै ‘मोटिभेट न्युज’ का पत्रकार शोभराज बराललाई पनि प्रहरीले दिउँसो नियन्त्रणमा लिएको छ। एकैदिन विभिन्न सञ्चारगृह र पत्रकारहरूमाथि भएका यी धरपकडका घटनाहरूप्रति पत्रकार महासंघले गम्भीर चासो र विरोध प्रकट गरेको छ।
