काठमाडौँ, १ पुस (रासस) । प्रधानमन्त्री शेरवहादुर देउवाले आफू छिटोभन्दा छिटो सत्ता हस्तान्तरण गर्न आतुर रहेको बताउनुभएको छ ।
नेकपा (माओवादीका केन्द्र) का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’संग शनिवार बिहान प्रम निवास बालुवाटारमा भएको भेटमा उहाँले सो कुरा बताउनुभएको हो । उहाँले नयाँ सरकार गठनको प्रक्रिया अगाडि बढाउन राष्ट्रियसभा निर्वाचन सम्बन्धी अध्यादेश अबिलम्ब जारी गर्नुपर्ने बताउनुभयो । अध्यादेशको लागि सरकारले सिफारीश गरेको उक्त विधेयक लामो समयदेखि राष्ट्रपति कार्यालयमा विचाराधीन छ।
प्रधानमन्त्री देउवाले वाम गठबन्धनले प्रतिनिधिसभा तथा प्रदेशसभा सदस्य निर्वाचनमा प्राप्त गरेको सफलताका लागि अध्यक्ष प्रचण्डलाई बधाई दिनुभएकोे थियो।
सो भेटमा अध्यक्ष प्रचण्डले तीन प्रमुख दलको सहमतिमा मात्र राजनीतिक र संवैधानिक नियुक्ति गर्न प्रधानमन्त्री देउवालाई आग्रह गरेका गर्नुभएको थियो।
अध्यक्ष प्रचण्डले प्रधानमन्त्री देउवालाई प्रतिनिधिसभा तथा प्रदेशसभा निर्वाचनमार्फत नयाँ जनादेश प्राप्त भइसकेको अवस्थामा संवैधानिक, राजनीतिक र प्रदेशका गभर्नर लगायतका नियुक्ति नगर्न ध्यानाकर्षण गराउनुभएको अध्यक्ष प्रचण्डका प्रेस सहयोगी मनहरि तिमल्सिनाले जानकारी दिनुभयो ।
अध्यक्ष प्रचण्डले राष्ट्रियसभा निर्वाचनका विषयमा प्रमुख दलकाबीच छलफलका माध्यमबाट निष्कर्ष निकाल्न सकिने भन्दै त्यसका लागि पहल गर्न प्रम देउवालाई आग्रह गर्नुभएको तिमल्सिनाले बताउनुभयो ।
