बराहक्षेत्र (सुनसरी),२७ चैत्र। चौथो टुबोर्ग अन्तर्राष्ट्रिय आमन्त्रण भरौल गोल्डकप फुटबल प्रतियोगिताको उपाधि दाफिन्स एफसी, क्यामरुनले जितेको छ ।
सुनसरीको बराहक्षेत्र–५ कालाबन्जर स्थित खेलमैदानमा बुधबार भएको फाइनल भिडन्तमा दाफिन्सले साविक विजेता रेड हर्स क्लब, इलामलाई ४–० ले हराउँदै उपाधि जितेको हो ।
दाफिन्सका लागि खेल शुरु भएको तेस्रो मिनटमै डिडेर टिनाले पहिलो गोल गरे । लगतै छैठौं मिनटमा अनगुइन जेआरले दाफिन्सको अग्रता दोब्बर पारे । खेलमा एकतर्फी नतिजा निकालेको दाफिन्सका लागि पहिलो हाफको २६औं र दोस्रो हाफतर्फ ४९औं मिनटमा दुई गोल गर्दै अफ्रिकी टोलीको शानदार पक्का गरे ।
बिजेता बनेको दाफिन्सले उपाधिसहित नगद ३ लाख हात पार्यो भने उपविजेता रेड हर्सले १ लाख ५० हजारमा चित्त बुझायो । दाफिन्सको समग्रमा यो छैठौं र लगातार दोस्रो उपाधि समेत हो ।
अफ्रिकी टोलीले भर्खरै सम्पन्न दुहबी गोल्डकपको उपाधि समेत उचालेको थियो ।
