काठमाडौं, १६ भाद्र । नेपाली नारीहरुको महान पर्व हरितालिकाको अवसरमा देश तथा विदेशमा रहेका सम्पूर्ण नेपाली चेलीहरुलाई राष्ट्रप्रमुख विद्यादेवी भण्डारी,सरकार प्रमुख के.पी. शर्मा ओली र प्रमुख प्रतिपक्षी दल नेपाली कांग्रेसका सभापति शेरबहादुर देउवाले सुस्वास्थ्य, दीर्घायु, सुख, शान्ति, समृद्धिका साथै पारस्पारिक सद्भावको शुभकामना व्यक्त गर्नुभएको छ।
आफ्नो शुभकामना सन्देशमा राष्ट्रपति भण्डारीले साँस्कृतिक सहिष्णुता र सामाजिक एकताको प्रतीकका रुपमा रहेको तीजमा नेपाली नारीहरुले आफ्नो सौभाग्य र परिवारजनको समृद्धिका लागि ब्रत बसेर भगवान शिव–पार्वतीको पूजा आराधना गर्ने प्रचलन रहेको उल्लेख गर्दै यसले नेपालीहरुलाई एकताको सूत्रमा आबद्ध गर्दै धार्मिक सहिष्णुता तथा सद्भाव कायम गर्न सघाउउने विश्वास व्यक्त गर्नुभएको छ ।
उहाँले सन्देशमा भन्नुभएको छ, नेपाली मौलिक संस्कृति सम्वर्धन गर्दै संस्कारयुक्त आदर्श सामाजिक वातावरण तयार गर्न र सदाचार जीवन शैली अपनाउनका लागी यस्ता चाडपर्वहरुको गरिमालार्इ सम्मानजनक बनाईराख्नु आजको आवश्यकता हो।
यसै गरी प्रधानमन्त्री केपी शर्मा ओलीले तीज पर्वले महिला मुक्ति र स्वतन्त्रताको भावना मुखरित गर्ने उल्लेख गर्र्दै नेपालमा महिला अधिकारको प्रयोग विश्वमै गौरव गर्न लायक भएको बताउनुभएको छ ।
प्रधानमन्त्री ओलीले नेपालमा महिलाको प्रतिनिधित्व संसदमा ३३ प्रतिशत र स्थानीय तहमा करिब ४१ प्रतिशत पुगेको तथ्य उल्लेख गर्दै प्रधानमन्त्रीले आउँदा दिनहरुमा महिला र पुरुषबीच सारभूत समानताका व्यवस्था अझ सुदृढ हुने विश्वास गर्नुभएको छ ।
त्यस्तै संघीय संसदमा प्रमुख प्रतिपक्षी दलका नेता तथा नेपाली कांग्रेसका सभापति शेरबहादुर देउवाले हरितालिका तीज पर्वको अवसरमा आफू र पार्टीका तर्फबाट शुभकामना व्यक्त गर्दै भन्नुभएको छ, हाम्रो देश अनेक धर्म, अनेक संस्कृति र अनेक पर्वले समृद्ध छ । यी पर्व हाम्रा पहिचान हुन्, गौरव हुन् । अनेक विमतिहरुका विचमा पनि हाम्रो समाजमा सौहार्दता र एकतालाई मजवुत तुल्याउन पर्वहरुले योगदान गर्दै आएका छन् । अतः सबै खाले पर्वमा आपसी प्रेम, सदभाव, विश्वास र भाईचारा व्यक्त गर्ने हाम्रो परम्पराले हाम्रो समाजलाई एक साझा फूलवारीका रुपमा प्रतिविम्वित गर्दै आएको छ ।
उहाँले तीजमा चेलीहरु माइत आउने र पारिवारिक सम्बन्धलाई अझ हार्दिक बनाउने भएकोले यसको विशेष महत्व भएको पनि उल्लेख गर्नुभएको छ ।
