मिजौरी(संयुक्त राज्य अमेरिका), १९ भाद्र । अमेरिकाको मिजौरीमा भएको सडक दुर्घटनामा तीन जना नेपालीको मृत्यु भएको छ ।
दक्षिणी मिजौरीको जोपलिन प्रहरीले दिएको जानकारी अनुसार दुर्घटनामा श्रद्धा खनाल ओझा, उनका बुवा गोविन्द खनाल र आमा शान्ता खनालको मृत्यु भएको छ ।
श्रद्धा र शान्ताको अस्पतालमा मृत्यु भएको थियो भने गोविन्दको घटनास्थलमै ज्यान गएको हो।
जोप्लिन प्रहरी विभागका क्याप्टेन निक जिमेनेजले दिएको जानकारी अनुसार प्रकाश ओझाले चलाएको टोयोटा कारलाई टोयोटा पिकअप ट्रकले पछाडिबाट ठक्कर दिएको थियो ।
घाइते कार चालक ओझा र उनका छोरालाई अस्पताल लगिएको छ भने घाइते बच्चाको अवस्था गम्भिर बताइएको छ । चालक ओझाको अवस्थापनि स्थिर बताइएको छ । दुर्घटना मिजौरी हाइवेको इन्टरस्टेट ४४ इष्टमा मंगलबार दिउसो भएको थियो ।
कारलाई ठक्कर दिने ड्राइभरको नाम सार्वजनिक गरिएको छैन भने प्रहरीले दुर्घटनाको अनुसन्धान गरिरहेको छ ।
अमेरिकामा सडक दुर्घटनामा ज्यान गुमाउने नेपालीहरुको संख्या बढ्दो छ । दुई बर्ष यता सार्वजनिक भएका सडक दुर्घटनाहरुमा ११ जना नेपालीले ज्यान गुमाएका छन् ।
