काठमाडौं, १६ आषाढ । लकडाउन सुरुभएपछि बीचमा परीक्षणको रुपमा दुई दिन खुलेर बन्द भई सोमबारदेखि खुलेको नेपाल धितोपत्र बिनिमयको दोस्रो बजारले मंगलबार निकै उत्साहजनक प्रवृत्ति देखायो ।

दिनको ११ : ०० बजे बजारखुलेदेखि नै खरिदकर्ताको चाप देखिएको बजारमा मंगलबार तीन पटक सर्किट ब्रेकर लागेर बजार निर्धारित समय पहिले नै बन्द गर्नु परेको छ ।

बजार खुलेको ४८ मिनेटमा नेप्से सूचक ४ प्रतिशतले बढेपछि २० मिनेटको लागि शेयर कारोबार बन्द भएको थियो। भने एक घण्टा १७ मिनेट बजार ५ प्रतिशतले बढेपछि ४० मिनेटको लागि कारोबार स्थगन भएको थियो।

खरिदकर्ताको निरन्तर उच्च चाप खेपेको धितोपत्रको दोस्रो बजारमा त्यसपछि पनि नेप्से परिसूचक बढ्ने क्रम रोकिएन र नेप्से परिसूचक ६ प्रतिशतले बढेपछि आजको लागि सेयर कारोबार बन्द हुन गयो।

बजार खुलेको दुई घण्टामा नेप्से सूचक ६ प्रतिशत अर्थात ७२.०५ अंकले बढेर १२६०.७५ विन्दुमा पुगेको थियो।

नेपाल स्टक एक्सचेञ्जले बजार खुलेको पहिलो एक घण्टाभित्र बजार परिसूचक ४ प्रतिशतले घटबढ भएमा सर्किट ब्रेक गरी १५ मिनेट बजार रोक्ने , दुई घण्टाभित्र ५ प्रतिशत घटबढ भएमा आधा घण्टा कारोबार रोक्ने र कारोबार समयमा ६ प्रतिशत घटबढ भएमा त्यसपछिको बाँकी समय कारोबार रोकिने नियम बनाएको छ ।

एकैदिन बजार घटबढ भएर लगानीकर्ताको सम्पत्तिको अधिमूल्यन र अवमूल्यन हुनेस्थिति आउन नदिन नेप्सेले यस्तो व्यवस्था गरेको हो । यसले बजारमा स्थिरता ल्याउन सघाउने नियमन निकायहरुको दावी छ ।

मंगलबारको करिब सबा घण्टामा १ सय ३४ कम्पनीका ४ लाख ८९ हजार ५ सय ३७ कित्ता सेयरको किनबेचबाट २२ करोड ७२ लाख १२ हजार १ सय ९४ रुपैया बराबरको कारोबार भएको थियो ।

मंगलबार नेप्से ७२.०५ अंकले बढेर १२६०.७५ बिन्दुमा पुगेको छ । यो सोमबारको तुलनामा ६.०६ प्रतिशतको बढोत्तरी हो ।

धितोपत्र दलाल व्यबसायीहरुको स्क्रिन सेयर नगरी अनलाइन पद्धतिमार्फत भएको मंगलबारको कारोबारले एकातिर धितोपत्र बजारमा एकाएक चमक आएको छ भने कारोबारलाई विद्युतीय पद्धति (अनलाईन) आधारित बनाउन ठूलो मद्दत पुगेको छ ।

यस दिन कारोबारमा आएका १२ वटा उपसमुहमध्य दुईवटा उपसमुहका सूचक नकारात्मक देखिएका छन भने बाँकी सबै उपसमुहका सूचक सकारात्मक देखिएका छन्।

Top Gainers

मंगलबारको कारोबारमा एसियन लाइफ इन्स्योरेन्स, सूर्य लाइफ इन्स्यारेन्स, नेपाल लाइफ इन्स्योरेन्स, नेशनल लाइफ इन्स्योरेन्स, शिवम् सिमेन्ट र नागरिक लगानी कोषको मूल्य १० प्रतिशत बढेर कारोबारमा सर्किट लागेको थियो भने साल्ट टे्रडिड., बिजय लघुवित्त,हिमालयन डिष्टिलरी,साना किसान, नेको इन्स्योरेन्स,शिखर इन्स्योरेन्स,अरुण कावेली,स्टाण्डर्ड चार्टर्ड, युनाइटेड इन्स्योरेन्स,नविल,इन्भेष्टमेण्ट बैंक,एभरेष्ट इन्स्योरेन्स, लाइफ इन्स्योरेन्स कम्पनी,मुक्तिनाथ विकास बैंक, नेपाल इन्स्योरेन्स कम्पनी, बैंक अफ काठमाडौंको सेयर मूल्य ९ प्रतिशतमाथि बढेको थियो ।

छोटो समय चलेको मंगलबारको कारोबारमा अधिकांश कम्पनीका शेयर मूल्य बढेको छ ।

यस दिन उल्लेखित कम्पनीका साथै साल्ट टे«डिङ कर्पोरेशन, विजय लघुवित्त वित्तीय संस्था, हिमालयन डिस्ट्रिलरी, साना किसान विकास बैंकका लगानीकर्ताले मनग्य कमाएका छन् ।

यस्तै नेपाल पुनर्बीमा कम्पनी, ओरियन्टल होटल, सानिामा इक्विटी, बेस्ट फाइनान्स, एनआईबिएल सम्बृद्धि फण्ड–१ का लगानीकर्ताले गुमाएका छन् ।