लण्डन(संयुक्त अधिराज्य), १६ बैशाख(बीबीसी) । कोरोनाभाइरस खोपको एउटै मात्राले घरभित्र हुने सङ्क्रमण दरलाई आधासम्म घटाउन सक्ने एउटा अध्ययनले देखाएको छ।

फाइजर वा एस्ट्राजेनेका खोपको पहिलो मात्रा दिइएका र त्यसको तीन हप्तापछि सङ्क्रमित भएका व्यक्तिले खोप नलगाएका व्यक्तिलाई भाइरस सार्ने सम्भावना ३८ देखि ४९ प्रतिशतसम्म कम रहने पब्लिक हेल्थ इङ्गल्यान्ड (पीएचई)ले जनाएको छ।

स्वास्थ्यमन्त्री म्याट ह्यानककले उक्त अध्ययनलाई ‘गज्जबको खबर’ भन्नुभएको छ।

उहाँले ‘योग्यता पुग्ने बित्तिकै तत्काल खोप लगाउन सबैलाई’ अनुरोध पनि गर्नुभएको छ।

सो निष्कर्ष खोप लगाएको लगभग १४ दिनपछि त्यसले दिने सुरक्षामाथि गरिएको अध्ययनको भएको पीएचईले जनाएको छ।

सुरक्षाको स्तर

पीएचईका अनुसार दुईमध्ये कुनै एक खोप लगाएको व्यक्तिलाई पहिलो मात्रा खोप लिएको चार हप्तापछि लक्षणसहित सङ्क्रमण देखिने जोखिम ६० देखि ६५ प्रतिशतले कम देखिएको छ।

पीएचईकी खोप प्रमुख डा. मेरी रामसे भन्नुहुन्छ, ‘खोप हाम्रो जीवनलाई साधारण अवस्थामा फर्काउन मद्दत गर्न महत्त्वपूर्ण छन्। खोपले रोगको गम्भीर असर कम मात्रै गर्दैनन्, दैनिक सयौँ ज्यान जोगाउन मद्दत गर्छन्।अहिले हामीले कोभिड-१९ अरूलाई सर्ने सम्भावनालाई कम गरेर खोपले थप प्रभाव देखाइरहेको पाएका छौँ।’

उहाँले अहिले प्राप्त जानकारी उत्साहजनक भए पनि मानिसहरूले आफूसँग भाइरस भएजस्तै गरी व्यवहार गर्नु महत्त्वपूर्ण रहेको उल्लेख गर्दै हात धुने र दुरी कायम गर्ने मापदण्ड पालना गर्नुपर्नेमा जोड दिइन्।

घरलाई सङ्क्रमणको उच्च जोखिम क्षेत्र मानिन्छ। पछिल्लो अध्ययनले खोपले सङ्क्रमण थप फैलन रोक्ने प्रारम्भिक प्रमाण उपलब्ध गराएको पीएचईको भनाइ छ।

यस्तै नतिजा सङ्क्रमणको जोखिम रहेका जेल वा संयुक्त आवास जस्ता अरू साझा आवास क्षेत्रमा पनि अपेक्षा गर्न सकिने पीएचईको भनाइ छ।

युनिभर्सिटी अफ वारविकका सङ्क्रामक रोग विशेषज्ञ माइक टिल्डिसलेले पछिल्लो निष्कर्ष महत्त्वपूर्ण रहेको र मानिसहरूले खोपलाई स्वीकार गर्नुपर्ने बताउनुभयो।

‘हामीले यी खोपहरू गम्भीर प्रकारका लक्षणहरू रोक्न वा तपाईँलाई हुनसक्ने सङ्क्रमण नियन्त्रण गर्न शत प्रतिशत सुरक्षित छैनन् भन्ने सम्झनुपर्छ।’, उहाँ भन्नुहुन्छ,तर प्रमाणहरूले उनीहरूले यदि तपाईँ सङ्क्रमित भइहाल्नुभयो भने पनि अरूलाई भाइरस सर्ने जोखिम केही कम हुने देखाइरहेको छ।’

उत्साहवर्द्धक नतिजा

उहाँले गम्भीर खालका लक्षणको जोखिम नरहे पनि धेरै व्यक्तिहरूलाई खोप लगाउनुपर्ने थप प्रमाण पछिल्लो अध्ययनले दिएको बताउनुभयो। त्यसबाट ठूलो जनसङ्ख्यालाई सुरक्षा दिन सकिने र कोभिड १९ का कारण गम्भीर रूपमा बिरामी पर्ने र ज्यान गुमाउने मानिसको सङ्ख्या कम हुने उहाँको भनाइ छ।

बीबीसीका विज्ञान संवाददाता पल्लव घोष भन्नुहुन्छ, खोपले भाइरसको सङ्क्रमणको दरलाई घटाइरहेको र ज्यान जोगाइरहेको सङ्केत पछिल्लो प्रमाणले दिएको छ।’

उहाँका अनुसार सङ्क्रमण विस्तार हुने प्रमुख ठाउँ घरधुरी भएकाले पछिल्लो अध्ययनको परिणाम विशेष रूपमा उत्साहवर्द्धक छ।

घोषका अनुसार नयाँ प्रकारका भाइरस देखा परेसँगै खोपहरू तीनमा कम प्रभावी हुने चिन्ता छ जसले नयाँ सङ्क्रमणका घटनामा वृद्धि गराउन सक्छ।

तर विज्ञहरूले अहिलेका खोपहरूले विशेष गरी गम्भीर प्रकारका बिरामीहरूमा उल्लेख्य सुरक्षा प्रदान गर्ने बताइरहेका छन्।