काठमाडौं, १२ साउन । सरकारले राष्ट्रिय योजना आयोगको उपाध्यक्षमा डा. विश्व पौडेललाई नियुक्त गरेको छ ।
मंगलबार बसेको मन्त्रिपरिषद बैठकले अर्थशास्त्री पौडेललाई उपाध्यक्ष नियुक्त गरेको हो ।
अमेरिकाको यूनिभर्सिटी अफ क्लालिफोर्नियाबाट विद्यावारिधी उपाधि हासिल गर्नुभएका युवा अर्थशास्त्री पौडेल स्वर्णिम वाग्ले योजना आयोगको उपाध्यक्ष रहदा आयोगको आर्थिक सल्लाहकार हुनुहुन्थ्यो ।
नेपाली कांग्रेसको समाजवादी नीतिमा गहिरो अध्ययन गर्नुभएका पौडेलसंग अन्तर्राष्ट्रिय श्रम संगठन (आईएलओ)को आर्थिक सल्लाहकारको रुपमा काम गरेको अनुभव पनि छ।
उहाँ काठमाडौं विश्वविद्यालय स्कुल अफ म्यानेजमेन्टका ‘एसोसियट प्रोफेसर’ हुनुहुन्छ ।
डा. पौडेलले कोरोनाको महामारीका कारण देशको आर्थिक र सामाजि विकासका साथै पूर्वाधार निर्माणका क्षेत्रमा विवेकपूर्ण तवरले योजनाहरु चयन गरी सम्पन्न गराउनु पर्ने बताउनुभएको छ ।
उहाँले आफ्नो पहिलो कार्य कोरोना महामारीले थिलोथिलो परेको देशको अर्थतन्त्रलाई उकास्ने गरी अल्पकालीन र दीर्घकालीन योजना निर्माण गर्नु रहेको बताउनुभएको छ ।
उहाँले चुनौतीको समयमा प्रधानमन्त्री र गठबन्धनका नेताहरुले गर्नुभएको आशा र विश्वासलाई निरासामा परिणत हुन नदिने बचनबद्धता दोहोर्याउनुभएको छ ।
उहाँले अर्थतन्त्रलाई चलायमान गराइने बताउदै युवालाई जिम्मेवारीलाई कुशलतापूर्वक निर्वाह गर्ने बताउनुभएको छ ।
