काठमाडौं, ३ कार्तिक । नेपाली कांग्रेसका केन्द्रीय सदस्य तथा सांसद गगन थापा वर्ष २०२१-२०२३ का लागि विश्व बैंक र आइएमएफको विधायिकी सञ्जालको सञ्चालक सदस्यमा निर्वाचित हुनुभएको छ ।
कांग्रेस युवा नेता थापाले आज आफ्नो ट्वीटरमा यसको जानकारी दिंदै खुसी लागेको बताउनुभएको छ ।
उहाँले “यस नेटवर्कको बोर्डमा रही विश्वका १ सय ४० भन्दा बढी देशका सांसदहरूसंगै अबको दुई वर्ष समावेशी विकासका लागि काम गर्न उत्साहित छु” भन्नुभएको छ ।
वर्ष २०२१-२०२३ का लागि The Parliamentary Network on the World Bank and IMF को बोर्ड मेम्बरका रुपमा निर्वाचित भएको कुरा जानकारी गराउन पाउँदा खुशी लागेको छ।यस नेटवर्कको बोर्डमा रही विश्वका १४० भन्दा बढी देशका सांसदहरूसंगै अबको दुई वर्ष समावेशी विकासका लागि काम गर्न उत्साहित छु। pic.twitter.com/TiOoKLHT1W
— Gagan Thapa (@thapagk) October 20, 2021
विश्व बैंक र अन्तर्राष्ट्रिय मुद्रा कोषको संसदीय सञ्जाल विश्व बैंक समूहको प्राथमिक संसदीय वार्ताकार समूह हो । यसमा विश्व बैंक र मुद्रा कोषका सदस्य राष्ट्रहरुका सांसदले विकास सहयोगमा बढ्दो उत्तरदायित्व र पारदर्शिताको वकालत गर्नेछन् ।
यसले सांसदहरुलाई स्थानीय राष्ट्रिय च्याप्टरहरु गठन गरी विश्व बैंकको राष्ट्रिय कार्यालय र विधायकहरुबीच सार्थक सलग्नता गर्न प्रोत्साहित गर्दछ ।
विश्व बैंकले क्षेत्रीय संसदीय संगठनहरु जस्तो युरोपियन पार्लियामेण्ट र पान अफ्रिकन पार्लियामेण्टसंग पनि वार्तालाई प्रबर्धन गर्न, सूचनाको साझेदारी गर्न र विकासका पैरवी गर्न निकट सम्बन्ध कायम गर्दै आएको छ ।
