काठमाडौं, २३ फागुन । फोर्ब्सको सूचीमा समावेश नेपालका एक मात्र खर्बपति विनोद चौधरीले एक वर्षमा २० अर्ब रुपैयाँ सम्पत्ति बढाएका छन् ।

विश्वभरीका खर्बपतिको सुची हरेक वर्ष सार्वजनिक गरिरहेको फोर्ब्सले सन् २०१८ मार्च ६ सम्मको सम्पत्ति विवरणका आधारमा सार्वजनिक गरेको सूचीका आधारमा चौधरीको सम्पत्ति २० अर्ब रुपैयाँ बढेको हो ।

सन् २०१७ र २०१८ को बीचको अवधिमा चौधरी ग्रुपका मालिकसमेत रहेका उनको सम्पत्ति गत वर्ष १ दशमलब ५ बिलियन डलर अर्थात १ खर्ब ५० अर्ब रुपैयाँ थियो । तर यो वर्ष मार्च ६ सम्ममा उनले आफ्नो सम्पत्ति बढाएर १ दशमलब ५२ बिलियन डलर अर्थात १ खर्ब ५३ अर्ब रुपैयाँ पुर्‍याएका हुन् ।

चौधरीले सम्पत्ति त बढाएका छन् नै अर्कातिर विश्वका धनाढ्यको सूचीमा पनि दुई स्थान माथि उक्लिएका छन् । यो पटक फोर्ब्सले विश्वभरबाट २२२०८ जना डलर खर्बपतिको सूची सार्वजनिक गरेको हो । जसमा चौधरी १५६१औँ स्थानमा रहेका छन् । अघिल्लो वर्ष उनी १५६३औँ स्थानमा थिए ।

यस पटक धनीहरुको सूचीमा विश्वभरबाट २५९ जनाले प्रवेश पाएका छन् । जसले विवाहको कपडादेखि लिएर बच्चाको खेलौना र विद्युतीय कारको ब्यापार गरेर यस सूचीमा परेका हुन् ।

फोर्ब्सका अनुसार चौधरीको आम्दानीको प्रमूख स्रोतका रुपमा नबिल बैंक, चौधरी ग्रुप अन्तर्गत देशदेखि विदेशसम्म रहेका उद्योग, रेस्टुरेन्ट र होटलहरु रहेको जानकारी दिएको छ।

फोर्ब्सका अनुसार चौधरीले पछिल्लो ६ वर्षयता आफ्नो सम्पत्ति करिब ५० अर्बले बढाइसकेका छन्। सन् २०१३ मार्चसम्म चौधरीको कुल सम्पत्ति एक खर्ब थियो । त्यसपछि २०१४ मा १ खर्ब १० अर्ब पुग्यो भने सन् २०१५ मा १ खर्ब ३० अर्ब पुग्यो । त्यसपछि सन् २०१६ मा भने घटेर १ खर्ब १० अर्बमा सीमित भयो । गत वर्ष उनको सम्पत्ति १ खर्ब ३० अर्ब पुगेको थियो ।

पढ्नुस्: अमेजनका बेजोस विश्वकै सर्वाधिक धनाढ्य, बिल गेट्स पछि परे

फोर्ब्सले यस पटक विश्वभरका २२०८ अर्बपतिहरुको विवरण संकलन गरेको छ। यिनीहरुको कुल सम्पत्ति ९.१ लाख करोड डलर रहेको छ। अघिल्लो साल यो आँकड़ा ७.७ लाख करोड डलर थियो ।

यो पटकको सूचीमा ७२ वटा देशका धनाढ्य समावेश भएका छन् । फोर्ब्सको यो सूचीमा सबैभन्दा धेरै अमेरिकाका ५८५ अर्बपति परेका छन् । ३७३ अर्बपतिसहित चीन दोस्रो नम्बरमा रहेको छ ।

फोर्ब्स को ‘विश्वका खर्बपतिहरुको सूची २०१८’ मा यस पटक अमेजनका संस्थापक जेफ बेजोस शीर्ष स्थानमा उक्लेका छन् ।

उनको सम्पत्ति ११२ अर्ब डलर अर्थात करिब १०.२ लाख करोड रुपैपाँ पुगेको छ। उनी पहिलो पटक विश्वकै धनीको सूचीमा पहिलो नम्बरमा उक्लिएका हुन् ।

बेजोस १०० अर्ब डलर भन्दा धेरै सम्पत्ति राख्ने विश्वकै पहिलो अर्बपति पनि भएका छन् । उनी लगातार चार वर्षदेखि शीर्ष स्थानमा रहेका माइक्रोसफ्टका संस्थापक बिल गेट्सलाई पछि पारेका हुन् ।

वर्ल्ड बिलियनेयर्स लिस्टमा ११९ भारतीय पनि सामेल छन् । यिनमा रिलायन्स इन्‍डस्ट्रिजका मुकेश अम्बानी शीर्ष स्थानमा छन् । उनी ४०.१ अर्ब डलर (करिब २.६१ लाख करोड भारतीय रुपैयाँ) सम्पत्तिसहित १९ औँ स्थानमा छन् ।