बोकरो, झारखण्ड(भारत)  । भारतको पूर्वी राज्य झारखण्डस्थित प्रहरीले एकजना किशोरीको सामूहिक बलात्कारपछि भएको भनिएको हत्याको घटनाका मुख्य सन्दिग्धलाई हिरासतमा लिएको छ।

गत शुक्रवार ती १६ वर्षीया किशोरीलाई जिउँदै जलाएको आरोप धन्नु भुइयाँ र उनका सहयोगीहरूमाथि लागेको छ।

किशोरीका आमाबाबुले गाउँका अगुवाहरूलाई उनीमाथि यौन दुर्व्यवहार बारे उजुरी गरेपछि ती पुरुषहरूलाई एकसय पटकसम्म उठबस गर्न लगाएका थिए र ७ ५० हजार भारतीय रुपैयाँ जरिवानास्वरूप तिर्न आदेश दिएका थिए।

सो दण्ड पाएपछि आक्रोशित बनेका तिनीहरूले किशोरीका आमाबाबुमाथि कुटपिट गरेका थिए र त्यसपछि किशोरीको शरीरमा आगो लगाइदिएको प्रहरीले बताएको छ।

एकजना आफन्त घरमा लुकेर बसिरहेको अवस्थामा भुइयाँ पक्राउ परेको प्रहरीले जनाएको छ।

ती आरोपितले हालसम्म उनीमाथि लागेको आरोपबारे केही प्रतिक्रिया जनाएका छैनन्।

भारतः बालिका बलात्कार गर्नेलाई मृत्युदण्ड

सामूहिक बलात्कार र हत्याको सम्बन्धमा हालसम्म प्रहरीले १५ जनालाई नियन्त्रणमा लिएको छ।

सो घटनाप्रति भारतभर आक्रोश व्यक्त भएको छ।

भारतमा शृंखलाबद्ध हिंसात्मक यौन अपराधहरू भएका खबर आइरहँदा यो पछिल्लो घटना भएको छ।

घटना

भारतको झारखण्ड राज्यमा एक १६ वर्षीया किशोरीलाई बलात्कार गरिएको गुनासो उनका बाबुआमाले गाउँका अग्रजहरूसमक्ष गरेपछि ती किशोरीलाई जिउँदै जलाइएको प्रहरीले जनाएको छ।

उक्त घटनामा संलग्न ठानिएका १४ जनालाई पूर्वी राज्य झारखण्डमा पक्राउ गरिएको छ।

प्रहरीका अनुसार गाउँलेहरूले बलात्कारको अभियोग लागेकालाई सजायस्वरूप ५० हजार रूपैयाँ तिर्न र १ सय पटक उठबस गर्न भनेका थिए।

तर आरोपितहरू निकै क्रुद्ध बने र ती किशोरीका बाबुआमालाई पिटे र उनलाई आगोमा राखे।

सहयोग
स्थानीय प्रहरी चौकीका अधिकारी अशोक रामले समाचार संस्था एएफपीलाई भने, “आरोपित दुई व्यक्तिले आमाबुवालाई पिटे र उनीहरूको घरमा गएर ती किशोरीलाई साथीहरूको सहयोगमा जलाए।”

ती किशोरीलाई उनका आमाबुवा विवाहमा गएका बेला घरबाट अपहरण गरिएको थियो।

स्थानीय प्रहरीले उनलाई दुईजना पुरूषले राजा केन्दुवा गाउँ नजिकैको जंगल क्षेत्रमा लगेर बलात्कार गरेको बताएका छन्।

घटनाबारे खोज्दै जाँदा आमाबुवाले गाउँका अग्रजहरूलाई अपराध गरेको ठानिएकाहरूविरुद्ध अभियोग चलाउन भनेका थिए।

गाउँका अग्रजहरूको समूहले कानूनी हैसियत राख्दैन।

विवाद
यद्यपि, भारतको विकट क्षेत्रमा उनीहरूको प्रभाव महत्त्वपूर्ण हुन्छ र भारतको महँगो न्यायिक प्रक्रियामा जानुभन्दा विवाद मिलाउने एउटा माध्यम पनि हो।

उक्त राज्यको प्रहरीले बलात्कारपछि हत्या घटनामा आफूले अनुसन्धान गरिरहेका १८ व्यक्तिमध्ये १४ जनालाई पक्राउ गरिसकेको जनाएको छ।

बलात्कार गर्ने दुईमध्ये एकलाई अझै पक्राउ गर्न बाँकी रहेको बोकरोका प्रहरी निरीक्षक शम्भु ठाकुरले हिन्दुस्तान टाइम्सलाई बताएका छन्।

भारतमा यौन हिंसासम्बन्धी अपराधहरूको शृङ्खलामध्ये यो पछिल्लो घटना हो।

सन् २०१६ मा मात्रै भारतमा ४० हजार बलात्कारका घटनाहरू प्रहरीसम्म पुगेका छन्।

यद्यपि बलत्कार र यौन हिंसाका विषय सामाजिक कलंकसँग जोडिएका कारण थुप्रै मुद्दाहरू रेकर्डमै नआएको ठानिएको छ।

बीबीसीबाट