काठमाडौं, ७ बैशाख । राष्ट्रिय स्वतन्त्र पार्टी (रास्वपा) को केन्द्रीय कार्यालयमा शुक्रवार भिडभाड र चहल पहल थियो।

देशका प्रमुख दलका प्रमुख नेताहरू एक पछि अर्को गर्दै रास्वपाको स्थापना दिवसमा सहभागी हुने हतारमा थिए।

उनीहरूलाई स्वागत र बिदाइ गर्न रास्वपाका नेताहरूलाई भ्याइ नभ्याई थियो।

नयाँ शक्ति बनाउने अभ्यास गर्दै अहिले नेपाल समाजवादी पार्टीको नेतृत्व गरिरहनुभएकका पूर्वप्रधानमन्त्री बाबुराम भट्टराई पनि शुभकामना दिन पुगेकाहरूको भिडमा देखिनुभएको थियो।

उहाँले सत्ताधारी रास्वपालाई पुराना राजनीतिक पार्टीहरूसँग दीर्घकालीन रूपमा सहकार्य नगर्न सुझाव दिनुभयो।

“पुराना शक्तिहरूसँगको सहकार्यलाई तत्कालको रूपमा कार्यनीतिको रूपमा लिनुपर्छ, वैकल्पिक नयाँ शक्तिहरूसँगको सहकार्य र देशलाई साँच्चिकै विकल्प दिने रणनीति बनाउनु पर्छ, त्यस्तो सन्तुलन भयो भने ठिक हुन्छ”, नेता भट्टराईले भन्नुभयो, “नत्र पुरानै शक्तिहरूसँगै बढी नै लसपस गर्न थाल्ने हो भने रणनीतिमा नोक्सान पर्ने र हराउने खतरा हुन्छ।”

सत्ता-यात्रापछि रास्वपाको ‘गति सुस्त’

रास्वपाका महामन्त्री डा। मुकुल ढकालले आफू ३८ वटा जिल्ला पुगेर २०७९ जनाभन्दा धेरैसँग अन्तर्क्रिया गरेर असार ५ गते काठमाडौं फर्किएको जानकारी दिनुभयो।

भ्रमणपछि उहाँले भन्नुभएको छ, “पार्टी जोगाउने वा नजोगाउने, हाम्रो औचित्य के होरु गम्भीर र उच्च संवेदनशील प्रश्नका अगाडी हामी खडा छौँ।”

त्यो कुरा स्वीकार गर्दै आफैमा केही परिवर्तन गरी अघि नबढे गाह्रो दिन सुरु हुने उहाँको टिप्पणी छ।

आरोह र अवरोह विकाशको नियम भएको बताउने नेता बाबुराम भट्टराईले पनि रास्वपाको मूल्याङ्कन गर्दै भन्नुभएको छस् “तर सत्तासँग जोडिएपछि त्यसको गतिमा केही मन्दता आउँछ, त्यो त अलिकति देखिन्छ।”

तर उपप्रधान तथा गृहमन्त्री समेत रहेका रास्वपा सभापति रवि लामिछानेले आफूहरू ‘उद्देश्यमा अडिग र गन्तव्यमा स्पष्ट’ रहेको बताउनुभएको छ।

उहाँले शुभचिन्तकहरूलाई आश्वस्त पार्दै सामाजिक सञ्जालमा भन्नुभएको छस् “घण्टी सिंहदरबार पस्यो, यो देशको मतपत्रमा सदाका लागि घण्टी चुनाव चिन्ह बस्यो। बाँकी काम हामी गर्छौ, तपाईँहरू न चिन्ता लिनुस्, न पिर गर्नुस्।”

तर नेता भट्टराईले आशङ्का गरे जस्तै रास्वपाकै शुभचिन्तक बताउनेहरूले पनि पुराना दलहरूसँगको सहकार्यलाई सहज नमानेको सामाजिक सञ्जालहरूमा बेलाबखत देख्न पाइन्छ।

‘बोल्ड’ निर्णय के हो ?

महामन्त्री ढकालले सामाजिक सञ्जालमार्फत सार्वजनिक गरेको धारणालाई पनि उनले जिल्लाहरूमा अन्तर्क्रिया गर्दा पाएको त्यस्तै सुझावपछिको निचोडको रूपमा हेरिएको छ।

“पार्टी जोगाउने हो, नेपाली जनताको आशा भरोसा जगाइ राख्ने हो भने हामीले उच्च सचेतना सहित जोखिम लिएरै भए पनि केही बोल्ड निर्णय गरेर जानपर्छ”, उहाँले भन्नुभएको छ, “मलाई विश्वास छ, हामी त्यस्तो निर्णय गर्न अलिकति पनि हच्किँदैनौँ।”

सरकारबाहिर हुँदा तनहुँ जिल्लाको उपचुनावमा जितेको रास्वपाको सत्तामा हुँदा इलाम उपचुनावमा जमानत समेत जोगिएन।