जेरुसेलम(इजरायल), ११ आषाढ(एजेन्सी) । इजरायलले गाजाको रफाहमा पुनः आक्रमण सुरु गरेको छ। इजरायली प्रधानमन्त्री बेञ्जामिन नेतान्याहुले गाजाको अभियान समापनतर्फ गएको र अब लेबनानकोे हिजबुल्लाहतर्फ इजरायलको अभियान केन्द्रित हुने संकेत गर्नुभएको छ।
इजरायली सेनाले दक्षिणी गाजा सहरमा रहेका हमासका दुई कार्यालय परिसरमा आक्रमण गरी धेरै हतियारहरू कब्जा गरेको आइतबार राफाह क्षेत्रमा कारबाही गरेको इजरायली रक्षा बलले जनाएको छ ।
रफाहको तेल अल–सुल्तान छिमेकमा इजरायली सेनाले हमासको तेल अल–सुल्तान ब्रिगेडका लागि प्रशिक्षण मैदानको रूपमा काम गर्ने हमास कार्यालय परिसरमा छापा मारेको र सैनिकले हतियार भण्डारण सुविधा र धेरै सुरूङसहित ब्रिगेडका कमान्डर महमुद हमदानको कार्यालय भेटिएको इजरायली रक्षा बल (आइडिएफ)ले जनाएको छ ।
आईडीएफले सुरूङको जाँच गरी नष्ट गर्ने बताएको छ ।
परिसर क्षेत्रमा सेनाले हमासको रफाह ब्रिगेड, यासेर नेटमा रकेट र मिसाइल फायरका कमान्डरको कार्यालयमा पनि छापा मारेको छ ।
अक्टोबर ७ मा गाजा सीमा नजिकै इजरायली समुदायमा हमासले गरेको आक्रमणमा कम्तिमा एक हजार २०० व्यक्ति मारिएका थिए भने हमासले २५२ जनालाई बन्धक बनाएको थियो ।
आक्रमणको बदलामा इजरायलले प्यालेष्टिनी गाजा क्षेत्रमा चलाएको हवाई तथा स्थल कारबाहीमा कम्तीमा ३७ हजार ५०० व्यक्तिको मृत्यु भएको छ ।
हिजबुल्लाहतर्फ केन्द्रित गर्ने प्रधानमन्त्री नेतन्याहूको भनाइ
इजरायली प्रधानमन्त्री बेन्जामिन नेतन्याहूले गाजामा हमासविरुद्धको लडाइँको वर्तमान चरण समाप्त हुँदै गएको बताउनुभएको छ । उहाँले लेबनानी लडाकू समूह हिजबुल्लाहसँग जुध्न इजरायलले आफ्नो उत्तरी सीमामा थप सैनिक पठाउन सक्ने बताउनुभयो ।
इजरायल र हिजबुल्लाह युद्धको नजिक पुगिरहेका बेला उक्त टिप्पणीले तनावलाई अझ बढाउने देखिएको छ । नेतन्याहूले गाजामा जारी युद्धको अन्त्य भने नभएको पनि सङ्केत गर्नुभएको छ ।
इजरायली नेताले एक लामो टिभी अन्तर्वार्तामा भन्नुभयो, “सेना दक्षिणी गाजा शहर रफाहमा आफ्नो हालको जमिनी आक्रमण पूरा गर्ने तयारीमा छ, यसको मतलब यो होइन कि हमासविरुद्ध युद्ध समाप्त भएको छ ।” उहाँले अबका दिनमा गाजामा कम सेना आवश्यक पर्ने र हिजबुल्लाहसँग लड्नका लागि सेना परिचालन गरिने बताउनुभएको छ ।
इजरायलको नेतन्याहू निकट मानिने टिभी च्यानल१४ लाई दिएको अन्तर्वार्तामा उहाँले भन्नुभयो, “हिलो र सबैभन्दा महत्वपूर्ण, रक्षाका लागि, तर दशौं हजार विस्थापित इजरायलीलाई घर फर्कन अनुमति दिन पनि हाम्रा केही सेनालाई उत्तरतर्फ स्थानान्तरण गर्ने सम्भावना छ र हामी त्यो गर्नेछौं ।”
इरान समर्थित हिजबुल्लाहले अक्टोबर ७ मा हमासको सीमापार आक्रमणपछि गाजा युद्ध सुरु गरेलगत्तै इजरायलमाथि आक्रमण सुरु गरेको थियो । इजरायल र हिजबुल्लाहबीच त्यसयता हरेक दिनजसो गोली हानाहान हुँदै आएको छ, तर पछिल्ला हप्ताहरूमा युद्ध चर्किंदै गएको छ ।
हिजबुल्लाह हमासभन्दा धेरै शक्तिशाली छ र नयाँ मोर्चा खोल्दा अन्य इरानी प्रोक्सीहरू र सम्भवतः इरान स्वयं संलग्न ठूलो, क्षेत्रव्यापी युद्धको जोखिम बढ्नेछ जसले सीमाको दुवैतर्फ भारी क्षति र ठूलो हताहती निम्त्याउन सक्छ ।
ह्वाइट हाउसका दूत अमोस होचस्टाइन गत साता इजरायल र लेबनानका अधिकारीसँग तनाव कम गर्ने प्रयासमा उक्त क्षेत्रको भ्रमण गर्नुभएको थियो । तर, लडाइँ भने जारी छ ।
नेतन्याहूले सङ्कटको कुटनीतिक समाधान खोज्न सकिने आशा व्यक्त गरे पनि आवश्यक परेको खण्डमा ‘फरक तरिकाले’ समस्याको समाधान गर्ने प्रतिबद्धता व्यक्त गर्नुभयो । “हामी विभिन्न मोर्चामा लड्न सक्छौं र त्यसका लागि हामी तयार छौं,” उहाँले भन्नुभयो ।
उहाँले कुनै पनि ‘कागजमा सीमित भएको सम्झौता’ मात्र नहुने बताउनुभएको छ ।
उहाँले भन्नुभयो, “हिजबुल्लाहलाई सीमाबाट गर्ने संयन्त्र र इजरायलीहरूलाई आफ्नो घर फर्काउनु पर्ने बताउँदै युद्ध सुरु भएको केही समयपछि दशौँ हजार मानिसहरूलाई सुरक्षित स्थानमा सारिएको थियो र उनीहरू अझै घर जान सकेका छैनन् ।”
हिजबुल्लाहले गाजामा युद्धविराम नहुञ्जेलसम्म इजरायलसँग लड्ने बताएको छ । समूहका नेता हसन नसरल्लाहले गत हप्ता इजरायललाई युद्ध सुरु नगर्न चेतावनी दिँदै हिजबुल्लाहसँग नयाँ हतियार र गुप्तचर क्षमता रहेको र यसले इजरायलभित्रका थप महत्वपूर्ण स्थानहरूलाई निशाना बनाउन मद्दत गर्न सक्ने बताउनुभएको थियो ।
