काठमाडौँ, ३२ साउनः नेपाल आयल निगमले पेट्रोलियम पदार्थको मूल्य घटाएको छ । बिहिबार बसेको निगम सञ्चालक समितिको बैठकले शुक्रबारदेखि लागू हुने गरी पेट्रोलियम पदार्थको मूल्य घटाउने निर्णय गरेको हो । निगमले पेट्रोलको मूल्य प्रतिलिटर रु पाँच तथा डिजेल र मट्टितेलको मूल्य प्रतिलिटर रु तीन घटाएको जनाएको छ ।
निगमका अनुसार पहिलो वर्गमा पेट्रोलको मूल्य प्रतिलिटर रु १ सय ६७ रहेकामा रु १ सय ६२ कायम भएको छ । दोस्रो वर्गका लागि प्रतिलिटर रु १ सय ६९ रहेकामा रु १ सय ६४ र तेस्रो वर्गका लागि प्रतिलिटर रु १ सय ७० रहेकामा रु १ सय ६५ कायम गरिएको छ ।
साथै डिजेल र मट्टितेलको मूल्य पहिलो वर्गका लागि रु १ सय ५५ रहेकामा रु १ सय ५२ कायम गरिएको छ । साथै दोस्रो वर्गका लागि रु १ सय ५७ रहेकामा रु १ सय ५४ र तेस्रो वर्गका लागि रु १ सय ५८ रहेकामा रु १ सय ५५ कायम गरिएको निगमले जनाएको छ ।
पहिलो वर्गमा चारआली, बिराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्ज छन् । साथै दोस्रो वर्गमा सुर्खेत र दाङ तथा तेस्रो वर्गमा पोखरा, काठमाडौँ, दीपायललाई राखिएको छ ।
