मोन्टरियल (क्यानडा), १९ असार । क्यानडामा जारी ग्लोबल टि-२० क्यानडा लिगमा मोन्टरियल टाइगर्सका सदस्य रहेका नेपाली बलर सन्दीप लामिछाने चम्किएका छन् ।
पहिलो खेलको अन्तिम ओभरलाई निरन्तरता दिँदै १७ बर्षीय लामिछानेले वेस्ट इन्डिजका क्रिस गेलको कप्तानीमा रहेको भेनकोभर नाइट्सबिरुद्द जादुमय प्रदर्शन गरे। खेलको सातौँ ओभरमा बलिंग गर्न आएका उनले दोश्रो बलमानै वाल्टनलाई विकेटकिपर दिनेस रामदिनको हातबाट स्टाम्पआउट गराए भने थप ४ बलमा हंगकंगका कप्तान बाबर हयातलाई डट गराउँदै प्रतियोगितामा मेडन ओभर बलिंग गर्ने पहिलो स्पिन बलर समेत बने।
त्यसपछि आफ्नो स्पेलको दोश्रो ओभरमा उनै हयातले १ छक्का प्रहार गरेपछि ११ रन खर्चेपनी दोश्रो स्पेलमा एकओभर बलिंग गर्नेक्रममा १ चौका खर्चिंदै तेस्रो ओभरमा ५ रन खर्चिए। आफ्नो अन्तिम तथा पारिको १६ औं ओभरमा ४ रन खर्चिंदै लामिछानेले ४ ओभरमा १ मेडनसहित १९ रन खर्चेर १ विकेट हातपारे।
उनको प्रदर्शनमानै टिमले बिपक्षीलाई २० ओभरमा १६६/६ को योगफलमा रोक्न सफल भयो।
सन्दीपको टीमले लक्ष्य पछ्याउनेक्रममा १९ ओभरमा १४१ रन बनाउँदै ९ विकेट गुमाईसकेको अवस्थामा ब्याटिंग गर्न आएका उनले बिश्व क्रिकेटमानै उत्कृस्ट मध्येका एक डेथ बलरको उपमा पाएका वेस्ट इन्डिजका आन्द्रे रसेललाई आफ्नो पहिलो ओभरमानै डिप एक्स्ट्रा कभरको माथिबाट छक्का प्रहार गरे।
उनको टिम १९.४ ओभरमा १४८ रनमा सबै विकेट गुमाउँदै १८ रनले पराजित भएपनि लामिछानेले उत्कृस्ट बलिंग र अविजित ७ रनको उत्कृस्ट ब्याटिंग नमुना प्रस्तुत गरे।
श्रीलंकन चर्चित बलर लासिथ मालिंगाको कप्तानीमा रहेको मोन्टरियल टाइगर्समा वेस्ट इन्डिजका चमत्कारी बलर सुनिल नारिन समेत रहेकाछन्। त्यस्तै अस्ट्रेलियाका पिटर सीड्डेल पनि रहेको टिमबाट खेलिरहेका लामिछानेले भारतमा सम्पन्न इन्डियन प्रिमियर लिगमा गरेको प्रदर्शन संयोगमात्र नभएको पुस्टि गरेका छन्।
ग्लोबल टि-२० क्यानडा लिग अन्तर्गत भिसा समस्याका कारण पहिलो खेल गुमाएका उनले दोश्रो खेलमा आफु त्यहाँ पुगेकै दिन खेलिएको खेलमा सन्दिप महँगो साबित हुँदै सुरुवाती ३ ओभरमा नै ५६ रन खर्चिएका थिए। तर कप्तान लासिथ मालिंगाले उनीमाथि भरोसा देखाउँदै चौथो ओभर पनि बलिंग गर्न लगाए। उक्त चौथो ओभरमा उनले मात्र १ रन खर्चेर १ विकेट लिएका थिए।
सन्दीपको टिमको आगामी खेल भोलि राति १:४५ बजे सोहेल तन्बिर कप्तानीको एड्मनटन रोयल्ससंग रहेको छ।
लगातार ३ वटा खेल हारेपछि मोन्टरीयल टाइगर्स अंकतालिकाको पुछारमा रहेको छ र प्ले-अफ चरणमा पुग्न आगामी खेलहरुमा जित अत्यावश्यक रहेको छ।
लिगको शिर्ष स्थानमा ड्वेन ब्राभो कप्तानीको विन्नीपिग हक्स रहेको छ।
