काठमाडौं, ५ फागुन। आजदेखि नेपालमा इन्टरनेशनल वुमन्स च्याम्पियनसिप फुटबल हुँदैछ । उद्घाटन खेलमा आयोजक नेपाल र कीर्गिस्तान आमने सामने हुँदैछन् ।
नेपाल र कीर्गिस्तान अन्तर्राष्ट्रिय महिला फुटबलमा ६ वर्षपछि खेल्न लागेका हुन् । खेल त्रिपुरेश्वरस्थित दशरथ रंगशालमा साँझ ६ बजे सुरू हुनेछ । त्यसअघि प्रतियोगितामा सहभागी अन्य दुई टिम म्यानमार र लेबनानबीच दिउँसो २ बजे पहिलो खेल हुनेछ ।
नेपाली टिमका मुख्य प्रशिक्षक राजेन्द्र तामाङले कीर्गिस्तानसँग ६ वर्षअघि खेले पनि अहिलेको टिम फरक रहेको बताउनुभएको छ । ‘कीर्गिस्तानसँग ६ वर्षअघि खेल्दा हामीले ८(२ ले जितेको थियो । त्यसपछि खेलेको छैन’ तामाङले भन्नुभयो, ‘पछिल्लो पटक कीर्गिस्तानले भारतसँग ओलम्पिक छनोटमा खेलेको रहेछ । उनीहरूको अहिलेको फुटबल फरक छ । ६ वर्षमा राम्रो सुधार गरेको देखिन्छ ।’
प्रशिक्षक तामाङले कीर्गिस्तानविरूद्ध राम्रो योजना बनाएर खेल्ने र जितका लागि खेल्ने बताउनुभएको छ । ‘उनीहरू बलियो बनेर आएको छन् । योजना बनाएर खेल्नुपर्छ ।हाम्रो राम्रो स्ट्राइकरहरू छन् । त्यसलाई अझ राम्रोसँग खेल्नुपर्छ । कीर्गिस्तानको काउन्टर अट्याक राम्रो छ र बल पोसेसन पनि राम्रो छ त्यसमा हामीले ध्यान दिनुपर्छ । जित निकाल्छौं तर अलि कठिन हुन्छ’ उहाँले आइतबार प्रि(म्याच कन्फ्रेन्समा भन्नुभयो ।
उता कीर्गिस्तानका प्रशिक्षक नेमाट्जान जाकिरोभले यो प्रतियोगिता राम्रो अवसर भएको बताउनुभयो । ‘हाम्रो लागि फोर नेसन्स कपमा सहभागी हुनु राम्रो अवसर हो । हामी राम्रो फुटबल देखाउन चाहन्छौं । महत्वपूर्ण कुरा युनिटी र क्यारेक्टर हो’ उहाँले भन्नुभयो ।
यस्तै पहिलो खेलमा नेपालसँग खेल्नेबारे सोध्दा प्रशिक्षक जाकिरोभले यो ठूलो जिम्मेवारी भएको बताउनुभयो । ‘नेपालसँग पहिलो खेल नै खेल्नु हाम्रो लागि ठूलो जिम्मेवारी हुनेछ । हामी स्टेडियमभरी दर्शकको अपेक्षा राख्दछौं ।’
यस्तै कीर्गिज कप्तान अबिबुल्ला किजी दिलनुराले आफ्नो टिम राम्रो रहेको र ट्रफी जित्नै आएको बताउनुभयो । त्यसो नभए पनि नयाँ टिमहरूसँग राम्रो अनुभव लिन खेल्ने बताउनुभयो । ‘हाम्रो टोली युवा छ । हामी यहाँ ट्रफी जित्न आएका हौं त्यो नभएपनि हामी नयाँ टिमसँग अनुभव बटुल्नेछौं’ उहाँले भन्नुभयो ।
पछिल्लो पटक नेपाल र कीर्गिस्तान नाजेज्दा कपमा खेलेका थिए । त्यसमा खेलमा नेपालको फराकिलो जितमा सावित्रा भण्डारी साम्बाले चार गोल गरेकी थिइन् ।
कीर्गिस्तानविरूद्ध ६ वर्षअघि खेल्दा ४ गोल गरेकी साम्बा यस खेलमा भने नखेल्ने प्रशिक्षक तामाङले बताउनुभएको छ । फ्रान्समा व्यावसायिक फुटबल खेलिरहेकी सावित्रा सोमबारै नेपाल आइपुग्ने कार्यक्रम छ । उनी पहिलो खेलमा आराममा हुने बताइएको छ ।
यस्तै ६ वर्षअघि कीर्गिस्तानविरूद्ध २ गोल गरेकी अनिता बस्नेत हाल पनि टिममा छिन् भने अन्य दुई गोलकर्ता निरु थापा र दिपा राईले राष्ट्रिय टिमबाट सन्यास लिइसकेका छन् ।
पछिल्लो पाँच खेलमा नेपालको प्रदर्शन ३ जित, १ बराबरी र १ हारको नतिजा छ । काठमाडौंमै भएको साफमा नेपालले माल्दिभ्स र श्रीलंकालाई समूह चरणमा हराएको थियो । भारतलाई सेमिफाइनलमा पेनाल्टी सुटआउटमा पराजित गरेको थियो । भुटानविरूद्ध बराबरीमा रोकिएको नेपाल साफको फाइनलमा बंगलादेशसँग २(१ ले पराजित भएको थियो ।
कीर्गिस्तानले भने अन्तर्राष्ट्रिय फुटबलमा धेरे खेल खेलेको छैन । सन् २०२२ मा काफा वुमन्स च्याम्पियनसिपमा चार खेल खेलेको कीर्गिस्तानले २०२३ मा ओलम्पिक छनोटमा २ खेल खेलेको थियो ।
काफा वुमन्स च्याम्पियनसिपमा कीर्गिस्तानले ताजकिस्तानलाई पराजित गरेको थियो । तुर्कमिनेस्तानसँग बराबरी खेलेको कीर्गिस्तान इरान र उज्वेकिस्तानसँग पराजित भएको थियो । यस्तै २०२३ अप्रिलमा भएको ओलम्पिक छनोटमा कीर्गिस्तान भारतसँगको दुवै खेलमा पराजित भएको थियो ।
नेपालमा पहिलो पटक महिला फुटबलको चार राष्ट्र सम्मिलित प्रतियोगिता हुन लागेको हो । यसलाई महिला फुटबल अघि बढाउने राम्रो अवसरको रुपमा समेत लिन सकिन्छ । त्यसैले कीर्गिस्तान विरुद्ध पहिलो खेल खेल्दा नेपाल सुखद सुरूवात गर्ने लक्ष्यमा छ ।
