काठमाडौँ , १७ फागुनः संस्कृति पर्यटन तथा नागरिक उड्डयनमन्त्री बद्रीप्रसाद पाण्डेले छिमेकी राष्ट्र चीनले सांस्कृतिक उत्थानका लागि लिएको नीतिले विश्व्कै लागि अनुकरणीय रहेको बताउनुभएको छ ।
चिनियाँ कम्युनिष्ट पार्टीको २०औँ बैठकद्वारा पारित भौतिक र सांस्कृतिक उन्नयनसम्बन्धी नीति र चिनियाँ अभ्यासबारे छलफल गर्न आज यहाँ आयोजित कार्यक्रममा उहाँले मानव जातिलाई भौतिक मात्र नभई आध्यात्मिक सुखसमेत प्रदान गर्ने कार्य सँगसँगै लैजानुपर्ने सन्देश चिनियाँ नीतिले दिएको बताउनुभयो । पछिल्लो समय चीनले कम्फुसियसका दर्शनलाई समाजको नैतिक विकासमा प्रयोगको नीति लिएको उल्लेख गर्दै मन्त्री पाण्डेले बुद्ध र हिन्दू दर्शनको ‘परोपकाराय पुण्याय तथा वसुधैव कुटुम्बकम्’सँग धेरै हदसम्म यो मिल्ने धारणा राख्नुभयोे ।
नेपालको सांस्कृतिक र प्राकृतिक सम्पदा चिनियाँ नागरिकका लागि आकर्षक र प्रिय रहेकाले उनीहरूलाई नेपाल भित्र्याउन नेपाली वायुसेवा चलायमान र सुरक्षित छ भन्ने विश्वास दिलाउन आवश्यक रहेको उहाँको भनाइ थियो ।
नेपालका लागि चिनियाँ राजदूत चेन सङ्गले चिनियाँ राष्ट्रपति सी जिन पिङ्गले सांस्कृतिक ‘रोड म्याप’ बनाएर समाजका जटिलताहरूको उत्तर दिन खोज्नुभएको बताउनुभयो । नयाँ पुस्तामा देखापरेको सांस्कृतिक जिज्ञासालाई राष्ट्रपति सीको अभियानले पूरा गर्ने पनि उहाँले बताउनुभयो ।
चिनियाँविज्ञ अतुल कोइरालाले अरनिकोदेखि सुरु भएको नेपाल चीन सांस्कृतिक आदान–प्रदानको सिलसिला युगौँसम्म जारी रहने बताउनुभयो ।
—
