काठमाडौं, २७ फागुन । नेपाल प्रहरीले प्रथम आइजीपी कप क्रिकेट प्रतियोगिता गर्ने भएको छ । मंगलबारदेखि सुरु हुने प्रतियोगिताको ट्रफी एक कार्यक्रमको बिचमा सार्वजनिक गरिएको हो ।
नेपाल प्रहरी खेलकुद समितिले क्रिकेट खेलाडी उत्पादनको उद्देश्यले आईजीपी कप सञ्चालन गर्न लागेको हो । यो प्रतियोगिता प्रहरीभित्रको आन्तरिक खेलकुद प्रतियोगिता हो ।
ट्रफीको अनावरण राष्ट्रिय प्रहरी प्रशिक्षण प्रतिष्ठानका कार्यकारी निर्देशक एवम् नेपाल प्रहरी खेलकुद समितिका सदस्य(सचिव प्रहरी अतिरिक्त महानिरीक्षक सुदिप गिरीले गर्नुभएको थियो ।
आईजीपी प्रतियोगितामा ७ प्रदेशको प्रहरी कार्यालय र काठमाडौंको १ गरी कुल ८ टोलीको सहभागिता रहने नेपाल प्रहरीले जनाएको छ।
नेपाल प्रहरीको इतिहासमा पहिलो पटक सञ्चालन हुने प्रतियोगिताबाट भविष्यमा संगठनभित्रबाटै स्तरीय खेलाडी उत्पादन गर्न सहयोग पुर्याउने विश्वास प्रहरीले लिएको छ ।
सोही अवसरमा नेपाल प्रहरी क्रिकेटको लागि ड्रिम प्रोजेक्टको रुपमा रहेको इन्डोर क्रिकेट मैदानको उद्घाटन गरिएको छ ।
ट्रफी अनावरण कार्यक्रम पश्चात इन्डोर मैदानको समुद्घाटन गरिएको थियो । मैदानको समुद्घाटन राष्ट्रिय प्रहरी प्रशिक्षण प्रतिष्ठानका कार्यकारी निर्देशक गिरीले रिवन काटी गर्नुभएको थियो।
नेपाल प्रहरीभित्र आन्तरिक खेलकुद अन्तर्गत यो वर्ष आइजीपी रनिङ शिल्ड पुरुष फुटबल प्रतियोगिता तथा प्रहरी दिवस रनिङ कप पुरुष भलिबल प्रतियोगिता भइसेकेको छ ।
नेपाल प्रहरीमा दिपेन्द्र सिंह ऐरी, कुशल भुर्तेल, आरिफ शेख, ललित नारायण राजवंशी, सागर ढकाल, करण के.सी. र गुल्सन कुमार झा जस्ता राष्ट्रिय क्रिकेट टोलीका पनि सदस्य रहेका छन्।
