बैंकक(थाईल्याण्ड),१० फागुन । आईसीसी महिला टी २० विश्वकप एशिया क्षेत्र छनोट प्रतियोगिता अन्तरगत नेपाली टिमले आज संयुक्त अरब इमिरेट्ससंग प्रतिस्पर्धा गर्दैछ ।

टेर्डथाई क्रिकेट मैदान बैंककमा स्थानीय समय १० बजे खेल सुरु हुनेछ ।

सात राष्टहरु सम्मिलित खेलमा नेपालले अहिलेसम्म दुई खेल खेलेको छ । नेपालले मलसियासंगको खेलमा जित निकाल्यो भने घरेलु टोली थाइल्याडसंगको खेलमा हार ब्यहोरेको छ । थाइल्याण्डको महिला टीम बलियो नै मानिन्छ । नेपालले २ अंक पाएको छ ।

यूएईले हालसम्म ३ खेल खेलेको छ र तीन वटै खेलमा जित निकालेको छ । उसले अहिलेसम्म हंगकंग,कुवेत र मलेसियासंग खेलिसकेको छ । यी तीनै टीम तुलनात्मक रुपमा कमजोर नै मानिन्छन् । यूएईले हालसम्म ६ अंक बटुलेको छ ।

नेपाललाई यो प्रतियोगितामा जित निकाल्न यूएईलाई जित्नुपर्ने दबाब छ ।

प्रतियोगिता अन्तर्गत नेपालले फेब्रुअरी २४ मा हंगकंग, फेब्रुअरी २५ मा चिन र फेब्रुअरी २७ मा कुवेतसंग खेल्ने कार्यक्रम रहेको छ।

राउण्ड रोबिन फर्म्याटमा आयोजना हुने प्रतियोगिताको विजेता टिमले आईसीसी टि२० बिश्व कप छनौट प्रतियोगिता २०१९ र आईसीसी महिला बिश्व कप २०२० ( एकदिवसीय ) छनौट प्रतियोगिता खेल्न छनौट हुनेछ।

यो प्रतियोगिताको शिर्ष स्थानमा रहने टिमले मात्र विश्वकप छनोटको अन्तिम चरणमा प्रवेश गर्नेछ ।

कुवेत, हंगकंग,मलेसिया,चीन,थाईल्याण्ड,नेपाल र यूएई गरी ७ टीम सहभागी खेलमा नेपालले आजको खेल पछि परम्भिक चरणका ३ खेल खेल्न पाउनेछ । क्रिकेटमा नेपालले तरक्की गरिरहेको बेला नेपाली महिला क्रिकेटरलाई भाग्यले पनि साथ दिने र केही भैहाल्ने ठूलै आशा खेल जगतले गरेको छ ।