Prakash Adhikari April 7, 2021

 

कोलम्बो(श्रीलंका), २५ चैत्र । मञ्चमै झगडा भएपछि श्रीलङ्कामा एउटा सौन्दर्य प्रतियोगिताकी विजेताको टाउकोमा चोट लागेको छ।

आइतवार पुष्पिका डिसिल्भाले मिसेस् श्रीलङ्काको उपाधि जित्नुभएको थियो।

त्यसको केही समयपछि सन् २०१९ की विजेताले डिसिल्भाको ताज खोस्नुभयो।

सम्बन्धविच्छेद भइसकेको दाबी गर्दै डिसिल्भालाई उपाधि दिइन नहुने ती पूर्वविजेताको भनाइ थियो।

तर उनको सम्बन्धविच्छेद नभएको पुष्टि भएको भन्दै आयोजकहरूले उक्त उपाधि डिसिल्भालाई फिर्ता दिएका छन्।

आइतवार साँझ कोलम्बोमा भएको एउटा समारोहमा निर्णायकहरूले उनलाई सन् २०२१ की विजेता घोषित गरेका थिए।

मिसेस् श्रीलङ्का

मिसेस् श्रीलङ्का

तर सन् २०१९ की विजेता क्यारलाइन जुरीले प्रतियोगिताको नियमानुसार प्रतिस्पर्धी विवाहित हुनुपर्ने भन्दै उहाँको ताज खोस्नुभयो।

‘पारपाचुके भएका महिलाले प्रतियोगितामा भाग लिन नपाउने नियम छ। त्यस कारण यो ताज दोस्रो स्थानमा रहेकी प्रतियोगीलाई दिनका लागि म यो कदम उठाउँदैछु’,उहाँले दर्शकहरूलाई भन्नुभयो।

त्यसपछि उहाँले रनरअपको शिरमा मुकुट लगाइदिनुभयो। आँखाभरि आँसु पार्दै डिसिल्भा मञ्चबाट बाहिरिएको उक्त कार्यक्रमको भिडिओमा देखिएको छ।

आफू छुट्टै बसे पनि सम्बन्धविच्छेद नभएको बताउने डिसिल्भासँग आयोजकहरूले माफी मागेका छन्।

फेसबुक पोस्टमा डिसिल्भाले टाउकोमा लागेको चोटका कारण आफू अस्पताल जानुपरेको उल्लेख गर्नुभएको छ।

आफूमाथि भएको ‘अनुचित र अपमानजनक’ व्यवहारका लागि कानुनी कदम चाल्ने पनि उहाँले बताउनुभएको छ।

‘श्रीलङ्कामा मजस्तै कैयौँ एकल आमाहरू छन् जो पीडित छन्’, उहाँले एउटा पत्रकार सम्मेलनमा भन्नुभएको छ।

‘यो ताज ती महिलाहरूलाई समर्पित गर्न चाहन्छु, ती एकल आमा जसले आफ्ना बच्चाहरूलाई एक्लै हुर्काउन दुःख गरिरहेका छन्।’

मिसेस् श्रीलङ्का
मिसेस श्रीलङ्काका राष्ट्रिय निर्देशकले बीबीसीसँग  डिसिल्भालाई ताज फिर्ता दिइने बताउनुभयो।

‘हामी निराश छौँ’, उहाँले भन्नुभयो। ‘मञ्चमा क्यारलाइन जुरीले जुन व्यवहार गरिन त्यो अपमानजनक थियो र मिसेस वर्ल्ड संस्थाले यो विषयमा छानबिन सुरु गरिसकेको छ।’

प्रहरीले जुरीसँग सोधपुछ गरिरहेको छ।

मिसेस श्रीलङ्का उक्त देशको प्रमुख सौन्दर्य प्रतियोगितामध्ये एक हो।

यसपालि देशका प्रधानमन्त्रीकी पत्नी पनि अतिथिका रूपमा उपस्थित हुनुहुन्थ्यो ।

Share Now

Leave a comment.

Your email address will not be published. Required fields are marked*