काठमाडौं, ८ फागुन । जाँच दिएर जिल्ला न्यायाधीश बन्न पनि कानूनका विद्यार्थीहरुलाई कठिन हुँदै गएको देखिएको छ ।
न्याय सेवा आयोगको आज बसेको बैठकले हालै जिल्ला न्यायाधीशको लागि लिएको लिखित परीक्षाको नतिजा सार्वजनिक गर्दा रिक्त पदमा छ भागको एक भागमात्र उत्तीर्ण भएपछि यस्तो अवस्था सार्वजनिक भएको हो ।
आयोगद्वारा आइतबार सार्वजनिक सूचनाअनुसार जिल्ला न्यायाधीशका १८ पदका लागि आवेदन आह्वान गरिएकोमा जम्मा ३ जना मात्रै उत्तीर्ण भएका छन्।
आन्तरिक खुल्लातर्फ ९ जनाका लागि आवेदन आह्वान गरिएको थियो। जसमा ३ जना मात्रै उत्तीर्ण भएका छन्।
खुल्लातर्फ ५ जनाका लागि आवेदन गरिएको थियो। आन्तरिक खुल्लातर्फ उत्तीर्ण भएका तीन जना नै खुल्लातर्फ पनि उत्तीर्ण भएका छन।
आन्तरिक खुलातर्फ ६, खुलातर्फ ५, महिलातर्फ २, आदिवासीरजनजातितर्फ १ र मधेशीतर्फ १ सिटमा कुनै पनि उम्मेदवार उत्तीर्ण नभएको आयोगले जनाएको छ।
लिखित परीक्षामा १सय ९६ जना सहभागी भएका थिए। आयोगले गत असोजमा लिखित परीक्षा लिएको थियो।
जिल्ला न्यायाधीशको आन्तरिक र खुला दुवैतर्फ उत्तीर्ण हुने भाग्यमानीहरुमा ओमबहादुर सोडारी, चन्द्रकुमार पोखरेल र भुवन गिरी हुनुहुन्छ ।
उहाँहरुको अन्तरवार्ता फागुन २९ गते ४ः३० मा हुने भएको छ ।
