पोखरा(कास्की), ३ कात्तिक । नेपाली सेनाको विभागीय टोली त्रिभुवन आर्मी क्लब नवौं राष्ट्रिय खेलकुदको च्याम्पियन भएको छ ।
२८ असोजमा औपचारिक उद्घाटन भएर एक सातासम्म गण्डकीका विभिन्न जिल्लामा सञ्चालन भएको नवौं राष्ट्रिय खेलकुदमा आर्मीले सर्वाधिक १ सय ७२ स्वर्ण सहित कूल ३ सय ७१ पदक जित्यो । आर्मीले १ सय९ रजत र ८९ कांस्य जित्यो ।
पहिलो पटक राष्ट्रिय खेलकुदको विजेताले पाउने ट्रफी सुन र चाँदी समावेश गरेर बनाइएको थियो । १० लाख रुपैयाँको लागतमा निर्माण गरिएको उक्त ट्रफी उचाल्ने आर्मी पहिलो टिम बन्यो ।
यो ट्रफीलाई सात प्रदेश, तीन वटै विभागीय टिमको मुख्यालयसहित विश्व सम्पदामा सूचीकृत भएका स्वयम्भू, बसन्तपुर दरबार स्क्वायर, भक्तपुर दरबार स्क्वायर र पाटन दरबार स्क्वायर, लुम्बिनी सँगै जनकपुरधाम र चन्द्रागिरिमामा पुर्याइएको थियो ।
प्रतियोगितामा एपीएफ विभागीय टोली दोस्रो बन्यो । एपीएफले ६४ स्वर्ण ७३ रजत र ८१ कास्यसहित १ सय ९५ पदक जित्यो । प्रतियोगिताको अन्तिम स्पर्धाको रुपमा रहेको पुरुष फुटबलको स्वर्ण पदक समेत एपीएफले जित्यो ।
प्रतियोगितामा तेस्रो स्थान नेपाल प्रहरीको विभागीय टोली नेपाल पुलिस क्लबले ओगट्यो । उसले ६१ स्वर्ण ६१ रजत र ७३ कांस्यसहित कूल १ सय २० पदक जितेको थियो ।
प्रदेशतर्फ आयोजक गण्डकी अगाडि रह्यो । ३२ स्वर्ण ३१ रजत र ५७ कांस्यसहित १ सय २० पदक जितेर गण्डकी चौथो भयो ।
बागमती २४ स्वर्ण ४७ रजत र ७४ कांस्यसहित १ सय ४५ पदक जितेर बागमती प्रदेश पाँचौ भयो ।
प्रदेश १ ले १० स्वर्ण २३ रजत र ५० कांस्यसहित ८३ पदक जितेर छैटौं भयो । सुदूरपश्चिम प्रदेश १० स्वर्ण १० रजत र ४३ कांस्यसहित ६३ पदक जितेर सातौं भयो ।
एनआरएनएले १० स्वर्ण ९ रजत र ७ कांस्यसहित २६ स्वर्ण जितेर आठौं भयो ।
लुम्बिनी प्रदेशले ६ स्वर्ण २२ रजत र ४० कास्यसहित ६८ पदक जितेर नवौं भयो भने मधेश प्रदेश ५ स्वर्ण ८ रजत र २६ कांस्यसहित ३९ पदक जितेर दशौं भयो ।
अन्तिम स्थानमा रहेको र दशौं राष्ट्रिय खेलकुद आयोजनाको जिम्मेवारी पाएको कर्णाली प्रदेशले २ स्वर्ण ४ रजत र १२ कांस्यसहित १८ पदक मात्र जित्यो ।
शुरुमा ४ सय ४ स्वर्ण पदकमा प्रतिस्पर्धा हुने घोषणा गरिए पनि प्याराग्लाइडिङ, पौडी र आर्चरीमा २ । २ स्वर्ण पदक र स्क्वास र सफ्ट टेनिसमा एक(एक स्वर्ण पदकको खेल स्थगित भएको प्रविधिक संयोजक हिमाल दाहालले बताउनुभयो ।
प्रतियोगिताका अधिकांश खेल गण्डकी प्रदेशका ८ जिल्लामा भएको थियो भने सुटिङ र पुरुष क्रिकेट काठमाडौंमा भएको थियो ।
