काठमाडौं, १३ पौष। नेपाल राष्ट्र बैंकका गभर्नर महाप्रसाद अधिकारीको शैक्षिक योग्यतामा प्रश्न उठाउँदै सर्वोच्च अदालतमा परेको रिट निवेदन सुनुवाइका लागि न्यायाधीश सुष्मालता माथेमाको एकल इजलासमा पेशी तोकिएको छ।
गभर्नर अधिकारीको शैक्षिक योग्यतामा प्रश्न उठाउँदै अधिवक्ताहरू दीपकराज जोशी, प्रतापसिंह ठकुराठी, दामोदर तिम्सिना र चूडामणि भण्डारीले बिहीबार सर्वोच्चमा रिट दर्ता गराउनुभएको थियो।
नेपाल राष्ट्र बैंक ऐन २०५८ को दफा २० गभर्नरका लागि शैक्षिक योग्यता न्यूनतम स्नातकोत्तर हुनुपर्नेमा गर्भनर अधिकारीको योग्यता सोअनुसार नभएकाले नियुक्ति बदरको माग रिट निवेदनमा गरिएको छ।
रिटमा निवेदकहरुले गभर्नर अधिकारीको योग्यता चार्टर्ड एकाउण्टेण्ट मात्र रहेको दाबी गरेका छन्। सो योग्यता स्नातकोत्तर नभएको रिट निवेदकहरुको दावी छ । तर गभर्नर अधिकारी पक्षधरहरुले चार्टर्ड एकाउण्टेण्टलाई स्नातकोत्तर सरहको मान्यता दिएको प्रमाणपत्र गभर्नरसंग सुरक्षित रहेको जिकीर गरेका छन्।
तात्कालीन ओली सरकारको पालामा २०७६ चैत २४ मा अधिकारी राष्ट्र बैंकको गभर्नर नियुक्त हुनुभएको थियो।
