कोलम्बो(श्रीलंका), २६ आषाढ । एसीसी महिला एशिया कप २०२४ का लागि श्रीलंका पुगेको नेपाली राष्ट्रिय महिला क्रिकेट टोली दोस्रो अभ्यास खेलमा पनि पराजित भएको छ ।
बुधवार भएको खेलमा नेपाल श्रीलंका बोर्ड महिला विकास टोली विरुद्ध ४ विकेटले पराजित भएको हो ।
नेपालले दिएको १ सय ७ रनको लक्ष्य ्श्रीलंका बोर्ड महिला विकास टोलीले १ बल बाँकी छँदा ६ विकेट गुमाएर हासिल गर्यो ।
श्रीलंकन टोलीका लागि ओपनर सेनारथ्नेले सर्वाधिक २७ रन बनाइन् । यस्तै सन्दिपनीले १९ तथा मधाराले १६ रन जोडिन् ।
नेपालका लागि कृतिका मरासिनी, कविता जोशी, इन्दु वर्मा र सबनम राईले समान १-१ विकेट लिए ।
तयसहनी सरी भिलेजमा पहिलो ब्याटिङ गरेको नेपाली टोलीले २० ओभरमा ७ विकेटको क्षतिमा १ सय ६ रन बनाएको थियो । नेपालका लागि कविता कुँवरले ३४ बलमा सर्वाधिक २९ रन बनाइन् । यस्तै इन्दु वर्मा ४३ बलमा २८ रन बनाएर अविजित रहिन् । सम्झना खड्काले ११ रन जोडिन् । अन्य ब्याटर भने चल्न सकेनन् ।
घरेलु टोलीका लागि देवमी भिहांगाले ३, सन्दिपनीले २ तथा थारिका सेववान्दी र सान्दिनु निसानसलाले १-१ विकेट लिए ।
पहिलो अभ्यास खेलमा नेपाल मंगलबार ३३ रनले पराजित भएको थियो । तेस्रो अभ्यास खेल जुलाई १६ का दिन हुनेछ ।
एशिया कपको उद्दघाटन खेलमा नेपालले युएई विरुद्ध जुलाई १९ मा खेल्दै प्रतियोगिताको सुरुवात गर्नेछ ।
नेपाल रहेको समूह ए मा भारत र पाकिस्तान समेत रहेका छन् ।
