ब्राम्पटन(क्यानडा), २८ साउन । नेपाली राष्ट्रिय क्रिकेट टोलीका कप्तान रोहितकुमार पौडेल आबद्ध टोरोन्टो नेसनल्स क्यानडामा आयोजित ग्लोबल टी २० लिगको चौथो संस्करणको च्याम्पियन भएको छ ।
डिफेन्डिङ च्याम्पियन मोन्ट्रियल टाइगर्समाथि सोमबार ८ विकेटको जितका साथ टोरोन्टोले उपाधि जितेको हो । नेपाली राष्ट्रिय टिमका कप्तान रोहितको अन्तर्राष्टिय लिगको उपाधि चुम्ने धोको क्यानडामा पूरा भएको छ ।
खेलमा प्रतिद्धन्द्धी टाइगर्सले दिएको ९७ रनको लक्ष्य टोरोन्टोले १५ ओभरमा २ विकेट गुमाएर पूरा गर्यो । टोरोन्टोको जितमा आन्द्रेस गौसले अविजित रहँदै सर्वाधिक ५८ रन बनाए । खेलमा रासी भान डर डुसेनले अविजित ३० रन बनाए । टोरन्टोलाई रोक्ने क्रममा टाइगर्सका लागि क्रेरबिन बोस र अजमतुल्लाह उमरजाईले समान १ । १विकेट लिए ।
त्यसअघि टस हारेर पहिले ब्याटिङ गरेको मन्ट्रियल टाइगर्सले निर्धारित २० ओभरमा ९ विकेट गुमाएर ९६ रन बनाएको थियो । टाइगर्सका लागि कोरबिन बोसले सर्वाधिक ३५, जसकरण सिंहले १६ तथा अनुप रविले १० रन जोडे ।
मन्ट्रियललाई रोक्ने क्रममा टोरोन्टोका लागि जेसन बेहरेनड्राफ्टले ३, रोमारियो शेफर्डले २ तथा जुनैद सिद्धिकी, मोहम्मद नवाज, निखिल दत्त र जितेन्द्रपाल माथरुले समान १ । १ विकेट लिए ।
ग्लोबल टी २० लिगमा नेपाली क्रिकेटर आबद्ध भएको टिम च्याम्पियन भएको यो तेस्रो पटक हो । यसअघि सन् २०१९ को दोस्रो संस्करणमा नेपाली क्रिकेटर सोमपाल कामी आबद्ध विनिपेक्स हव्स च्याम्पियन भएको थियो । २०२३ मा अलराउन्डर दीपेन्द्रसिंह ऐरी आबद्ध मोन्ट्रियल टाइगर्स च्याम्पियन भएको थियो ।
यो संस्करणमा नेपालका सन्दीप लामिछाने र दीपेन्द्रसिंह ऐरी सम्मिलित भान्कुवर नाइट्स भने लिग चरणबाटै बाहिरिएको थियो ।
