जेरुसेलम(इजरायल), ४ भाद्र (बीबीसी) । अमेरिकी विदेशमन्त्री एन्टोनी ब्लिङ्कन र इजरायली प्रधानमन्त्री बेन्जमिन नेतन्याहुबीच “सकारात्मक र सौहार्दपूर्ण” रूपमा तीन घण्टा लामो वार्ता भएको उहाँको कार्यालयले बताएको छ।
नेतन्याहुले बन्धकहरूको रिहाइका निम्ति अमेरिकाले राखेको प्रस्तावप्रतिको प्रतिबद्धता दोहोर्याउँदै इजरायली सुरक्षा चासोलाई केन्द्रमा राखेको बताइएको छ।
यसअघि ब्लिङ्कनले गाजामा युद्धविराम र बन्धक रिहाइका निम्ति सम्झौता गर्न “अहिले सम्भवतः सबैभन्दा राम्रो र अन्तिम मौका” भएको बताउनुभएको थियो।
इजरायली राष्ट्रपतिसँग सोमवार भएको एउटा भेटघाटका क्रममा पछिल्लो अभिव्यक्ति दिनुभएका ब्लिङ्कनले गत अक्टोबरमा युद्ध शुरू भएयता सो क्षेत्रको भ्रमण गरेको यो नवौँ पटक हो।
गत साता दोहामा वार्ता पुनः शुरू भएपछि सहमतिमा पुगिनेमा अमेरिकाले आशा व्यक्त गरेको छ।
तर हमासले गाजाबाट इजरायली सेना पूर्ण रूपमा फिर्ता हुनुपर्ने भनी सम्झौतामा समेटिनुपर्ने विषयमा प्रगति नभएको भन्दै आशङ्का व्यक्त गरेको छ।
“सहमति हुनबाट टाढा लैजाने गरी युद्ध नचर्कियोस्, एकअर्कालाई उक्साउने काम नहोओस् भन्ने कुरा सुनिश्चित गर्न आफूहरू लागिपरेको” ब्लिङ्कनले बताउनुभएको छ।
“अक्टोबर ७ यता मैले इजरेल, मध्यपूर्वको भ्रमण गरेको यो नवौँ पटक हो र बन्धकहरूलाई घर फर्काउन, युद्धविराम गर्न अनि शान्ति एवं दिगो सुरक्षाको बाटोमा सबैलाई लैजानका निम्ति यो एउटा निर्णायक क्षण, सम्भवतः सबैभन्दा राम्रो र अन्तिम अवसर हो” उहाँले भन्नुभयो।
इजरायल र हमासबीचको दूरी घटाउने उद्देश्यका साथ अमेरिकाले प्रस्तुत गरेको संशोधित प्रस्तावमाथि पछिल्ला संवादहरू केन्द्रित छन्।
आउँदो सातासम्म सहमतिमा पुगिन सकिनेमा अमेरिकी पक्षको विश्वास रहेको छ।
इजरायल र हमासको भनाई
तर सहमतिमा पुगिनेमा इजरायली र हमास नेतृत्व कत्तिको आशावादी छन् भन्नेबारे बाहिर आएको छैन।
दुवै पक्षले एकअर्कालाई हठ त्याग्न नसकेको र सम्झौतामा पुग्न नदिएको आरोप लगाउँदै आएका छन्।
आइतवार जारी गरेको एउटा वक्तव्यमा हमासले इजरायली प्रधानमन्त्री बेन्जमिन नेतन्याहुमाथि “सम्झौताको बाटोमा तगारो हालेको र युद्ध लम्ब्याउने नियतले नयाँ शर्त एवं मागहरू तेर्स्याइरहेका” आरोप लगाएको थियो।
गत वर्षको अक्टोबर ७ मा १ हजार २ सय जनाको मृत्यु र २ सय ५१ जना बन्धक बनाउने गरी हमासले दक्षिण इजरायमा अभूतपूर्व हमला गरेपछि हमासविरुद्ध इजरायलले आक्रमण थालेको हो।
हमासद्वारा सञ्चालित स्वास्थ्य मन्त्रालयका अनुसार इजरायली आक्रमणयता गाजामा ४० हजार जनाभन्दा बढी व्यक्ति मारिएका छन्।
गत नोभेम्बरमा भएको सातदिने सङ्घर्षविरामको अवधिमा १ सय ५ जना बन्धकलाई हमासले मुक्त गरेको थियो भने इजरायलले करिब २ सय ४० जना प्यालेस्टिनी कैदीलाई रिहा गरेको थियो।
इजरायलका अनुसार अझै १ सय ११ जना बन्धक मुक्त हुन बाँकी छन् जसमध्ये ३९ जना मारिएका हुन सक्ने अनुमान छ।
