काठमाडौं, २ असोज । चितवन को–ई ग्रुपले भोटेकोशी त्रिशूली बाढी प्रभावितको राहत तथा पुनस्थापना लागि प्रधानमन्त्री दैवी प्रकोप उद्धार कोषमा १ करोड ५० लाख रुपैयाँ सहयोग गरेको छ।
राष्ट्रिय विपद् व्यवस्थापन, खोज तथा उद्धार एवं राहत अभियानमा सहयोग पुर्याउने उद्देश्यले ग्रुपले प्रधानमन्त्री दैवी प्रकोप उद्धार कोषमा उक्त रकम प्रदान गरेको हो।
सहयोग रकममध्ये ग्रुपअन्तर्गतको मनकामना दर्शन प्रालिले १ करोड २५ लाख रुपैयाँ र चितवन मिल्क लिमिटेडले २५ लाख रुपैयाँ प्रदान गरेका छन्।
चितवन, गोरखा तथा आसपासका क्षेत्रसँग ग्रुपको लामो समयदेखि सामाजिक तथा व्यावसायिक सम्बन्ध रहँदै आएको छ। ती क्षेत्रमा विपद् आइपरेका बेला सामाजिक उत्तरदायित्वअन्तर्गत प्रभावित नागरिकको साथमा उभिने प्रतिबद्धताअनुरूप सहयोग गरिएको ग्रुपले जनाएको छ।
ग्रुपका संस्थापक स्वर्गीय लक्ष्मणबाबु श्रेष्ठले व्यवसायको सफलता समुदायको सहयोग, विश्वास र सम्बन्धसँग जोडिने भएकाले कठिन परिस्थितिमा समुदायप्रति जिम्मेवार हुनुपर्ने मान्यता राख्दै आउनुभएको थियो। उहाँले स्थापित गरेको सामाजिक उत्तरदायित्वको भावनालाई निरन्तरता दिँदै विपद्को समयमा सहयोग गरिएको ग्रुपले जनाएको छ।
उक्त सहयोगबाट विपद् प्रभावित परिवारलाई तत्काल राहत उपलब्ध गराउन, पुनर्स्थापना तथा पुनर्निर्माणका कार्य अघि बढाउन र प्रभावित समुदायलाई सामान्य अवस्थामा फर्काउन सहयोग पुग्ने ग्रुपको विश्वास छ।
