काठमाडौं, ३१ जेठ । भारतीय अभिनेत्री सन्नी लियोनको नृत्य रहेको नेपाली फिल्म ‘पासवर्ड’ को पहिलो गीत सार्वजनिक भएको छ ।

‘मेरो नाम सन्नी’ बोलको गीतमा अर्जुन पोखरेलले संगीत भरेका छन् । गायिका दुर्गा खरेलको स्वर रहेको गीतमा विक्रम जोशीको शब्द लेखन छ । गीतको भिडियोमा भारतीय कामुक अभिनेत्री सन्नीको लोभ लाग्दो प्रस्तुति छ ।

बिहीबार राजधानीमा एक कार्यक्रमबीच सार्वजनिक गरिएको गीतमा सन्नीलाई दुई सयभन्दा बढी डान्सरले साथ दिएका छन् । गीतको कोरियोग्राफी विष्णु देभाले गरेका हुन्, जो बलिउडका प्रख्यात डान्स कोरियोग्राफर हुन् । उनले सलमान खान, शाहरुख खानलाई नचाइसकेका छन् ।

https://www.youtube.com/watch?v=TGNlBS9xXtI

गीतमा सन्नीसँग फिल्मका लिड अभिनेता बिक्रम जोशी (विक्की) ले पनि नृत्य गरेका छन् । भिडियोमा अभिनेता अनुविक्रम शाही र कलाकार बुद्धि तामाङले पनि साथ दिएका छन् । ‘पासवर्ड’ को कथा र स्कृनप्लेको माग अनुरुप नै सन्नीलाई गीतमा नृत्य गराइएको निर्देशक सम्राट बस्नेतले बताए । निर्माताले यो फिल्मको गीतमा डान्स गरेकी सन्नीलाई २ करोड भारु पारिश्रमिक स्वरुप बुझाएका थिए ।

फिल्म एबी इन्टरनेशनलको ब्यानरमा बनेको फिल्ममा अभिनेता अनुपविक्रम शाही नेगेटिभ रोलमा छन् । यसलाई हिरालाल जोशी र अमित बस्नेतले निर्माण गरेका हुन् । फिल्मका कार्यकारी निर्माता अंकित गौतम हुन् । फिल्ममा सौरभ लामाको छायांकन छ । रविन्द्र झा, प्रविण खतिवडा, लिसा सुनारलगायतको पनि फिल्ममा अभिनय छ ।

फिल्म ‘पासवर्ड’ भाद्र २७ गतेबाट देशभर प्रदर्शनमा आउँदैछ ।